"Заң және тәртіп" қағидатын ілгерілету аясында Алматы қаласында Қазақстан Республикасы Ұлттық ұланының Бауыржан Момышұлы атындағы 5571 әскери бөлімінің 406 әскери қызметшісінің жауынгерлік қызметке кірісуіне арналған салтанатты іс-шара өтті, – деп хабарлайды aqshamnews.kz тілшісі.
Әскери қызметшілер мегаполис тұрғындарының қауіпсіздігін қамтамасыз ету және қоғамдық тәртіпті сақтау міндеттерін орындауға кірісті.
Салтанатты жиында әскери бөлім командирінің бірінші орынбасары – штаб бастығы Нұрлан Азеров пен Алматы қаласы Ішкі саясат басқармасы Қоғамдық даму орталығы басшысының орынбасары Болатжан Әл-Фараби Нұрбекұлы сөз сөйледі.
Әскери бөлім басшылығының атынан сарбаздарға антқа, мемлекетке және заңға адалдықтың нышаны ретінде "Конституцияға адалмыз!" атты естелік жадынамалары салтанатты түрде табысталды.
Спикерлер өз сөздерінде Ұлттық ұланның "Заң және тәртіп" қағидатын жүзеге асырудағы, құқықтық мәдениетті нығайтудағы және қоғамдық тұрақтылықты қалыптастырудағы айрықша рөлін атап өтті.