Алматыда 2025-2026 жылдарға арналған жылыту маусымын аяқтау туралы шешім қабылданды. Қалалық энергетика және сумен жабдықтау басқармасы өкілдерінің мәліметінше, ауа райының жылынуына және сыртқы ауаның орташа тәуліктік температурасының бес тәулік қатарынан +8 градустан жоғары тұрақты сақталуына байланысты, жылу беру 3 сәуірден бастап кезең-кезеңімен тоқтатылады, – деп хабарлайды aqshamnews.kz тілшісі.
Жылу жүйесін өшіру жұмыстары белгіленген тәртіппен жүзеге асырылады: алдымен әкімшілік ғимараттар, кейін тұрғын үйлер, ал ең соңында әлеуметтік нысандар қамтылады.
Басқарма өкілдерінің айтуынша, жылыту маусымы қалыпты режимде өтті. Қала тұрғындарына жылу мен электр қуаты тұрақты жеткізіліп, жылу көздері мен желілеріндегі температуралық талаптар толық сақталды.
Жылыту кезеңінде қала қызметтері жоғары дайындық режимінде жұмыс істеді. Төтенше жағдайлардың алдын алу және жедел әрекет ету мақсатында қажетті құрал-жабдықтармен қамтамасыз етілген апаттық бригадалар жасақталды. Жалпы алғанда, 104 апаттық бригада құрамында 400-ге жуық маман және 100-ден астам арнайы техника жұмылдырылды.
2025 жылы жылумен жабдықтау жүйесінің сенімділігін арттыру бағытында кешенді жұмыстар жүргізілді. Соның нәтижесінде 39 шақырым жылу желісі жаңғыртылып, 17 қазандық жаңартылды, сондай-ақ 67 қазандықта жөндеу жұмыстары атқарылды. Қабылданған шаралар жылыту маусымы барысында жылудың үздіксіз берілуін қамтамасыз етіп, техникалық ақаулардың алдын алуға мүмкіндік берді.