Алматы қаласында AMANAT партиясының қалалық филиалы жанындағы Коммуналдық инфрақұрылым, энергетика, сумен жабдықтау және қалалық мобилділік жөніндегі кеңестің 2025 жылға арналған қорытынды отырысы өтті.
Отырыста партияның сайлауалды бағдарламасын іске асыру жөніндегі Жол картасы аясында соңғы үш жылда Алматы қаласында жүзеге асырылған инфрақұрылымдық және көлік жобаларының нәтижелері қаралды. Жиын барысында жауапты басқармалар атқарылған жұмыстар туралы есеп беріп, негізгі көрсеткіштерге тоқталды. 2023–2025 жылдары қала жол желісін жаңғыртуға бағытталған кешенді жұмыстар жүргізілді. Магистральдық, радиалды және ішкі көшелерді салу мен қайта жаңарту нәтижесінде жолдардың жақсы және қанағаттанарлық жағдайдағы үлесі 95 пайызға жетті. Бұл қала ішіндегі көлік қозғалысының қауіпсіздігі мен өткізу қабілетін арттыруға ықпал етті.
Қоғамдық көлік жүйесін дамыту аясында жаңа бағыттар іске қосылып, қала маңы маршруттары кеңейтілді. Нәтижесінде қоғамдық көлікпен жолаушылар тасымалы тәулігіне 1,7 миллион адамға дейін өсті. Қаланың автобус паркі газбен жүретін автобустармен, троллейбустармен және электробустармен жаңартылып, экологиялық таза көлік үлесі ұлғайды. Сонымен қатар, электр көлігін қолдау мақсатында электромобильдерге арналған 531 зарядтау станциясы пайдалануға берілді. Бұл көрсеткіш «AMANAT» партиясының бағдарламалық міндеттері аясында экологиялық инфрақұрылымды дамыту жөніндегі жоспарлы тапсырмалардың мерзімінен бұрын орындалғанын көрсетті.
Жиын қорытындысында атқарылған жұмыстардың оң нәтижелері атап өтіліп, алдағы кезеңде қалалық инфрақұрылымды одан әрі дамыту, көлік қолжетімділігін арттыру және тұрғындар үшін қолайлы қалалық орта қалыптастыру негізгі басымдықтар ретінде белгіленді.