Ерболат Досаевтың тапсырмасы бойынша Алматыда заңсыз құрылысқа бақылау күшейтілді
Алматыда қала әкімі Ерболат Досаевтың тапсырмасына сәйкес заңсыз құрылысқа бақылау күшейтілді. 2022 жылдың басынан 2025 жылдың мамырына дейін 90 нысан - рұқсатсыз салынған құрылыстар толық немесе жартылай сүрілді. Бұл туралы Алматы қаласының қала құрылысы бақылау басқармасы хабарлады.
Биылдың өзінде 20 заңсыз салынған құрылыс бұзылды. Олардың қатарында тұрғын кешендер, әкімшілік ғимараттар, жапсарлас салынған нысандар, дәмханалар, көлік жуу орындары және басқа да құрылыстар бар. Атап айтқанда, ірі нысандардың ішінде «Мечта» таунхаусы, «KHAN» ТҮК, сондай-ақ, Достық даңғылындағы 7 қабатты әкімшілік ғимарат бар.
Ерекше назар таулы аймақтарға аударылып отыр. Бұл жерлерде заңсыз құрылысқа қарсы шаралар күшейтілген. Қазіргі таңда 38 нысан бойынша сот шешімі шығарылып, олардың 13-і толық немесе ішінара сүрілді. Тағы 3 нысанда құрылыс жұмыстары бастапқы кезеңінде тоқтатылған.
Барлық жұмыс сот шешімі мен ресми нұсқамалар негізінде, сот орындаушыларының қатысуымен жүргізілуде. Заңсыз құрылысқа тосқауыл қою жұмыстары жалғасып жатыр.