Алматыда «Жайлы мектеп» ұлттық жобасы аясындағы құрылыс қарқынды жалғасуда, деп хабарлайды aqshamnews.kz
Қала әкімінің орынбасары Бейбіт Шаханов жаңа оқу орындарының құрылыс барысын тексерді.
Қазіргі таңда мегаполисте 11 700 оқушыға арналған 8 жаңа мектептің құрылысы жүріп жатыр. Нысандар қаланың әр ауданында Qazaq Stroy, Azimut, Time Group Construction және BI Group сынды жеке компаниялардың қаражаты есебінен салынуда. Құрылыс аяқталған соң мектептер Алматы қаласының коммуналдық меншігіне беріледі.
Құрылыс компанияларының өкілдері барлық жұмыс белгіленген мерзімде аяқталатынын атап өтті.
«Біздің басты мақсатымыз – балалардың үшінші тоқсаннан бастап оқуын жаңа мектептерде жалғастыруы. Ешқандай сылтау қабылданбайды. Бірақ жылдамдық сапаға әсер етпеуі керек. Мектептердің жабдықталуы, спорт алаңдарының сапасы және абаттандыру деңгейі жоғары стандарттарға сай болуы тиіс», – деді Бейбіт Шаханов.
Биыл Алматыда ұлттық жоба аясында әкімдік жанындағы жобалық кеңсенің қолдауымен 22,5 мың оқушыға арналған 12 мектептің құрылысы аяқталды. Оның ішінде 7 мектеп жаңа оқу жылының басында ашылды, ал 5 мектеп екінші тоқсанда оқушыларды қабылдайды.
