Қазақстанда бүгінде 100 жастағы және одан асқан 448 азамат тіркелген.
Олардың ең көбі — еліміздің ең ірі мегаполисі Алматы қаласында тұрады. Мұнда 100 және одан жоғары жастағы 58 адам бар, - деп хабарлайды Aqshamnews.kz.
Ұзақ өмір сүретіндердің саны бойынша екінші орында — Түркістан облысы (53 адам), ал үшінші орында — Алматы облысы (37 адам) тұр.
Ең жасы үлкен қазақстандық — Ұлытау облысының тұрғыны, ол жуырда 115 жасқа толған туған күнін атап өтті.
Ұзақ өмір сүрушілер үштігіне сондай-ақ Павлодар облысында тұратын 113 жастағы, және Жамбыл облысындағы 110 жастағы азаматтар кіреді.
Еске сала кетейік, жыл сайын 1 қазанда Қазақстанда және әлемнің көптеген елдерінде Халықаралық қарттар күні атап өтіледі. Бұл күн Біріккен Ұлттар Ұйымының Бас Ассамблеясы 1990 жылы 14 желтоқсанда жариялаған.
Мерекенің мақсаты – егде жастағы адамдардың мемлекет пен қоғам дамуына қосқан үлесін құрметтеу, олардың мәселелері мен қажеттіліктеріне назар аудару, өмір сүру сапасын жақсарту және қарттарға жан-жақты қамқорлық көрсету.