Қалада жылыту маусымы қалыпты жағдайда өтіп жатыр. Әлеуметтік нысандарға 8 қазанда, тұрғын үйлерге жылу 10 қазаннан бастап берілетін болды.
Өңірлік коммуникациялар қызметінде Энергетика және сумен жабдықтау басқармасының басшысы Нұрбақыт Серікбай осылай деп мәлімдеді.
Басқарма басшысының айтуынша, Алматыда биылғы күзгі және қысқы кезеңге даярлық барысында инженерлік желілерді жаңарту басты назарда болды. Биыл 39 шақырым жылу желісі қайта жаңғыртылды. Бұл желілердің тозу деңгейін 1,8%-ға төмендетуге мүмкіндік берген.
«Жыл сайын жылу желілерінің тозу деңгейін 1,8–2%-ға төмендетуді жоспарлап отырмыз», - деді Нұрбақыт Серікбай.
Қазір қаланың барлық апаттық қызметтері күшейтілген жұмыс режимінде істеп жатыр. 100-ден астам апаттық бригада мен 400-ге жуық маман жұмылдырылған. Мазут пен көмір қоры да жеткілікті.
Спикердің айтуынша, тұрғындардың әлі де жылу желілеріне берешегі бар. Аралық кезеңде бұл мәселе жеке сот орындаушылары арқылы шешіліп жатыр. Ол жылу ақысын уақытылы төлеу инженерлік желілерді жаңартып, инвестициялық бағдарламаларды іске асыруға мүмкіндік беретінін атап өтті.
Еске салайық, Алматыда жылыту маусымы қала әкімінің қаулысына сәйкес 8 қазанда басталды. Бірінші кезекте балабақша, мектеп пен медициналық мекемелер сияқты әлеуметтік нысандарға жылу берілді.
