Алматы өңірлік коммуникациялар қызметінің алаңында Халықаралық балаларды қорғау күніне орай ұйымдастырылған «Бала қауіпсіздігі – басты назарда» іс-шаралар кешеніне арналған баспасөз конференциясы өтті.
Шара туралы Алматы қаласы Төтенше жағдайлар департаментінің Мемлекеттік өрт бақылау басқармасы бастығының орынбасары Еркебұлан Жұматаев баяндады, деп хабарлайды aqshamnews.kz.
Іс-шараның аясында қоғамдық орындарда, БАҚ пен әлеуметтік желілерге жарияланған 724 ақпараттық материал жарық көрді. Ата-аналары мен балаларды қосып есептегенде, ол материал 14 987 адамды қамтыған.
ТЖ жөніндегі департаменттің ақпаратына қарағанда, мемлекет басшысының IV ұлттық құрылтайда «Қазақстан балалары» атты бағдарлама әзірлеуді тапсырғанына байланысты, балаларға қауіпсіздіктің алғышарттарын үйретіп, өрт сөндіруші мен құтқарушы мамандығына құрметпен қарауды оқытатын ауқымды іс-шаралар болып өткен.
29 мамыр күні Медеу ауданы әкімдігі, Республикалық жедел-құтқару жасағы және ҚР ТЖМ Төтенше медицина орталығының қолдауымен 28 гвардияшы-панфиловшылар саябағында өткен ауқымды іс-шараға 500 бала қатысты. Балалар өрт сөндіру мен құтқару техникаларын көріп, кинологиялық қызметтің жұмысымен танысты. Сонымен қатар, алғашқы медициналық көмек көрсету және төтенше жағдайлар кезіндегі мінез-құлық ережелері бойынша шеберлік сағаттары өтті.
Іс-шара аясында «Құтқарушылар мен өрт сөндірушілер балардың көзімен» атты сурет байқауы ұйымдастырылып, жеңімпаздар марапатталып, сыйлықтар табысталды. Бұл байқауға балалар ерекше ықыласпен қатысты.
Мерекелік көңіл күйді аниматорлар мен қаланың символы барыс қолдады. Сонымен бірге, ҚР ТЖ министрінің бейнеқұттықтауы мен қауіпсіздік тақырыбындағы бейнероликтер көрсетілді.
Әлеуметтік осал санаттағы балалар да назардан тыс қалмады. 26 мамырда ТЖД қызметкерлері SOS Children’s Village Almaty балалар ауылында «Қауіпсіздік шекарасыз» атты көшпелі іс-шара өткізді.
«Іс-шара барысында балаларға өрт кезіндегі эвакуация тәртібі түсіндіріліп, өрт сөндіру техникалары мен жабдықтары көрсетілді. Сонымен қатар, арнаулы киімді киюден жарыс ұйымдастырылып, алғашқы көмек көрсету мен судағы қауіпсіздік ережелері бойынша сабақ өтті», – деді, Еркебұлан Жұматаев.
Мереке қуыршақ театрының қойылымымен, марапаттар мен сыйлықтар табыстаумен аяқталды.
Сонымен қатар, Педиатрия және балалар хирургиясы ғылыми орталығында емделіп жатқан бүлдіршіндерге арнап та мерекелік бағдарламалар ұйымдастырылды. Ал Бостандық ауданының ТЖ басқармасы Республикалық спорт колледжі базасында балаларға қалай жүзу керектігін үйрететін дәріс өткізді.
Департаменттегілер мұндай іс-шаралар балалардың көзін ашып, олар оқыс оқиға кезінде қауіпсіздік мәселесіне жауаптырақ қарауды үйренетінін айтты.