2024 жылдың аяқталуына да санаулы күндер қалды. Әдеттегідей, осы кезеңде алматылықтар өткен жылдың маңызды оқиғаларына көз жүгіртіп, есте қалған сәттерді еске алады. 2024 жыл Алматы үшін ерекше табысты болды. Қаланың инфрақұрылымы мен әлеуметтік саласында бірнеше маңызды өзгерістер орын алып, мегаполис тұрғындары жаңа мүмкіндіктер мен жетістіктерді атап өтуде. Төменде Алматының биылғы негізгі жетістіктерін саралап берген шаһар тұрғындарының пікірлерін жариялап отырмыз.
Әуежай терминалы
Туризм саласының маманы Айымбибі Нұрмашева Алматы халықаралық әуежайының жаңа терминалының ашылуын ерекше атап өтті. Бұл жоба қаланың халықаралық беделін арттырып, туристер ағынын көбейтуге мүмкіндік береді. Заманауи талаптарға сай салынған ғимарат кеңдігімен, инклюзивті қызметтерімен және жоғары сапалы инфрақұрылымымен ерекшеленеді. Бұл – елдің дамыған және инновациялық болашағын көрсететін тағы бір маңызды қадам.
Жастарға қолдау
Алматының студенттері үшін 2024 жыл жағымды жаңалықтармен есте қалды. Жүргенов академиясының 2-курс студенті Айым Дәуренқызы жастарды жатақханалармен – студенттер үйлерінде бөлмелермен қамтамасыз ету, стипендияның өсуі жастарға айтарлықтай қолдау болатынын атап өтті. Бұл өзгеріс студенттерді білім алуға ынталандырып, жақсы нәтижелерге жетуге итермелейді. Жастарды қолдау – болашаққа салынған ең үлкен инвестиция.
ЦОН қызметі және
"Халық қатысатын бюджет" жобасы
Зейнеткер Дәулет Өсерханұлы мемлекеттік қызмет көрсетудің жеңілдегенін айтып, алғыс білдірді. Бұрын құжаттарды жинау мен рәсімдеу күрделі және ұзақ уақытты қажет етсе, бүгінде бұл процесс «бір терезе» қағидасы бойынша тез әрі сапалы жүзеге асырылады. Зейнеткерлердің жүйке жүйесін сақтай отырып, қызмет көрсету мәдениетінің артқаны – әлеуметтік реформалардың нәтижесі. Сондай-ақ, зейнеткер Алматы қаласы әкімдігінің "Халық қатысатын бюджет" жобасының тұрғындардың жайлы тұрмысы үшін, шаһардың көркі мен тазалығы үшін маңызын ерекше атап өтті.
Білім саласындағы серпіліс
Жас маман Бейбіт Мұратұлы Алматыда жаңа мектептердің ашылуын асыға күтуде. Бұл бастама мектептердегі орын тапшылығын жоюға, сапалы білім беруді қамтамасыз етуге және педагогтарға қосымша жұмыс орындарын ұсынуға ықпал етеді. Сонымен қатар, жаңа білім беру орындарының заманауи жабдықтармен қамтамасыз етілетіні сапалы оқыту процесінің негізгі факторына айналмақ.
Көктөбенің жаңа келбеті
Қала тұрғындары Көк-Төбе телемұнарасының ерекше жарықтандырылғанын мақтанышпен атап өтті. Кәсіпкер Ермұрат Қажымұрат телемұнараның қалаға заманауи әрі инновациялық реңк бергенін жеткізді. Бұл тек архитектуралық шешім ғана емес, сонымен қатар мегаполистің жаңа символына айналды. Әлеуметтік желілерде бұл көрікті орынның фотосуреттері үлкен қызығушылық тудыруда.
"Ұзақ өмір сүру орталығы" жобасы
және тегін Wi-Fi
Зейнеткер Салтанат Рысбекқызы Алматы метросындағы тегін Wi-Fi желісінің қала тұрғындары мен қонақтарына үлкен жеңілдік әкелгенін айтты. Енді кез келген жолаушы метро станциясында интернетке қосылып, қажетті ақпаратты оңай таба алады. Бұл қадам мегаполистің цифрландыру саласындағы жетістігін көрсетеді. Зейнеткер сондай-ақ қала әкімдігі ұйымдастырған тегін Ұзақ өмір сүру орталықтарының зейнеткерлер үшін маңызы мен өте тиімділігін атап өтіп, қала басшыларының ұтымды жобасына ризащылығын білдірді.
2024 жыл Алматы үшін жаңа белестерді бағындырған табысты жыл болды. Әуежай терминалынан бастап жаңа мектептер мен қоғамдық көлік қызметіне дейінгі өзгерістер қала тұрғындарының өмір сапасын арттырып, болашаққа сенім ұялатады. Бұл жетістіктер – қаланың даму қарқынын және тұрғындардың мегаполиске деген мақтанышын дәлелдейді. Алматы алдағы жылдарда да өсіп-өркендей беретіні сөзсіз.