Қазақстан театры тарихында алғаш рет Алматының төрт театр ұжымы әлемдегі ең ірі тәуелсіз театр фестивальдерінің бірі – Францияда өтетін Avignon Off фестиваліне қатысады. Фестиваль 2025 жылдың шілде айында өтеді, деп хабарлайды aqshamnews.kz
Делегация құрамына Қазақстанның жетекші тәуелсіз екі театры – ARTiSHOK және JOLDA, сондай-ақ Мемлекеттік қуыршақ театры мен Алатау мемлекеттік театры кіреді. Бұл ұжымдардың фестивальге қатысуы қазақстандық театр сахнасының халықаралық мойындалуына және елдер арасындағы мәдени диалогтың нығаюына маңызды қадам болмақ.
Жоба Алматы қаласы әкімдігінің қолдауымен жүзеге асырылуда, ал оның ұйымдастыру және үйлестіру жұмыстарын Almaty Creative креативті индустрияларды дамыту орталығы атқарады.
«Бұл Алматы үшін стратегиялық қадам: біз әртістерімізге жаңа мүмкіндіктер ашып, қазіргі заманғы қазақстандық өнерді халықаралық аренада көрсетіп, мәдени дипломатияның берік негізін қалаймыз», – деді Almaty Creative орталығының бас директоры міндетін атқарушы Бақыт Елюбаева.
Avignon Off фестивалі – Авиньондағы ресми фестивальге параллель өткізілетін бағдарлама, жыл сайын әлемнің түкпір-түкпірінен жүздеген тәуелсіз труппаны жинайды. Avignon Off фестиваліне қатысу әртістерге өздерін танытуға, халықаралық байланыстар орнатуға және даму жолдарын ашуға мүмкіндік береді.
Алматы бағдарламасы фестиваль аясында түпнұсқа авторлық қойылымдарды, сондай-ақ классикалық сюжеттердің заманауи интерпретацияларын қамтиды, бұл қазақстандық театрлардың көркемдік тілінің байлығын көрсетеді.