Алматы тауындағы Бутаков сарқырамасы маңынан бір күн бұрын жоғалған қыз өлі табылды, - деп хабарлайды aqshamnews.kz тілшісі.
Бұл туралы Алматы қалалық ТЖД баспасөз қызметі мәлімдеді.
"19 желтоқсан күні кешке 102 қызметіне туысы қоңырау шалып, қыздың таулы аймаққа сноуборд тебуге шығып, байланысқа шықпай қалғанын хабарлаған", – делінген хабарламада.
Ақпарат түскеннен кейін іздеу аумағына құтқару қызметінің күштері, полиция қызметкерлері, ТЖМ РОСО құтқарушылары, сондай-ақ еріктілер жіберілді. Оқиға орнында Алматы қаласы мен Алматы облысы ТЖД басшылығымен жедел штаб құрылды.
"20 желтоқсанда сағат 13:04-те іздестіру-құтқару жұмыстары барысында Бутаков сарқырамасы ауданында Букреев шыңы маңында жоғалған қыздың денесі табылды", – деп нақтылады баспасөз хабарламасында.
Құтқарушылар мәйітті теңіз деңгейінен 2 100 метр биіктен Бутаков шатқалындағы бақылау-құтқару бекетіне дейін түсіріп, кейін полиция қызметкерлеріне тапсырды.
"Сот-медициналық сараптама тағайындалды. Соңғы сәйкестендіру барлық қажет сараптама аяқталғаннан кейін жүргізіледі", – делінген хабарламада.
Іздестіру-құтқару жұмыстарына Алматы қаласы, Алматы облысы ТЖД, құтқару қызметі, ТЖМ РОСО, ТЖМ апат медицинасы орталығы және еріктілерден 73 адам, 10 техника, 5 ұшқышсыз ұшу аппараты, 3 кинологиялық есептоп жұмылдырылды.