Халықаралық IQAir компаниясы жасаған рейтингке әлемнің 125 ірі қаласы кірген.
Алматы қаласы тағы да ауа сапасы нашар қалалар тізіміне енді, деп хабарлайды aqshamnews.kz
Energyprom мәліметінше, биылғы мамыр айының екінші жартысында Алматы бұл тізімде 42-орыннан көрінді. Қаладағы ауаның ластану деңгейі – орташа, ал ауа сапасының индексі – 61.
Былтырғы деректермен салыстырғанда, мамыр айы – ең нашар кезең емес. Алматыда ауа сапасы ең күрт нашарлайтын уақыт – желтоқсан мен наурыз аралығы, яғни қыстың ең суық кезеңі. Өткен жылдың қаңтар айының ортасында Алматы тіпті нақты уақыттағы рейтингте әлемдегі ең лас қала ретінде тіркеліп, индекс 250-ден асқан болатын. Ауа райы жылынып, қыс аяқталған соң да жағдай біршама жақсармайды. Бұл – оңтүстік астана үшін жыл сайын қайталанатын экологиялық мәселе.
«Қазгидромет» РМК мамандары Алматыны атмосфералық ауаның жоғары және өте жоғары ластану деңгейі бар қалалар қатарына жатқызады. Мұндай қорытынды екі экологиялық көрсеткіш – стандартты индекс және ластанудың ең жоғары жиілігі негізінде жасалған. Соңғы бірнеше жылда Алматыда стандартты индекс көрсеткіші тұрақты түрде 5-тен 10-ға дейінгі аралықта тіркеліп, жоғары ластану деңгейіне сай келген. 2023 жылы бұл көрсеткіш 15,6-ға дейін жетіп, өте жоғары деңгейге жеткен.
Ең жоғары жиіліКккөрсеткіші бойынша да жағдай ұқсас: Алматыда бұл көрсеткіш 20%-дан жоғары болса – жоғары, ал 50%-дан асқанда – өте жоғары деңгейге сәйкес келеді. Бұл көрсеткіштердің жиі қайталануы Алматы ауасының тұрақты түрде ластанатынын білдіреді.
Ауаның ластануына негізгі себеп – автокөлік. Бұл тек болжам емес, Алматы қаласы бойынша шекті рұқсат етілген шығарындылар туралы есепке енген нақты дерек. Үкімет жариялаған құжатқа сәйкес, жылдық 189 мың тонна шығарындылар көлемінің 112,7 мың тоннасы немесе 59,6%-ы автокөлік үлесінде. Тағы 52,1 мың тонна немесе 25%-ға жуығы – стационарлық көздерден шығатын зиянды заттар.