Алматыда биыл қатты тозған 70 км су құбыры және кәріз желілерін ауыстыру жоспарланып отыр
«Инвестиция орнына тариф» саясаты аясында инфрақұрылымды жаңартуға және табиғи ресурстарды үнемдеуге бөлінетін қаражат көлемі артты. Бұл туралы өңірлік коммуникациялар қызметінде өткен брифингте «Алматы Су» ШЖҚ МКК бас директоры Ілияс Қазиев мәлімдеді, деп хабарлайды aqshamnews.kz
Оның айтуынша, 2025 жылы қаланың су құбыры және кәріз жүйелеріне «Алматы Су» қаражатынан 18 млрд теңге инвестиция тарту жоспарланған.
«Су құбыры мен кәріз жүйесінің тозған 70 шақырым желісі ауыстырылады. Жұмыс жүргізу кезінде су беру шектелмеуі үшін барынша күш салынып, көлік қозғалысына кедергі келтірмеу үшін де шаралар қабылданады», – деді Ілияс Қазиев.
Сонымен қатар, биыл 4 сорғы станциясы жөнделіп, 200 дана сорғы жабдығы, 444 дана жапқыш арматура, 4 трансформаторлық подстанция жаңартылып, 2 таза су резервуары жөнделіп, жаңадан салынады.
Ірі жобалар қатарында Мыңбаев көшесіндегі магистральді су құбырын ауыстыру, Таусамалы шағын ауданында инженерлік желілер жүргізу және Тимирязев көшесіндегі траншеясыз әдіспен су құбырын қайта жаңарту жоспарланған.
«Бұл қаладағы 240 мың тұрғынын сумен жабдықтау сапасын арттыруға мүмкіндік береді», – деді спикер.
Сондай-ақ, қаланың су жүйесін жаңарту аясында өрт гидранттарын, су алатын ұңғымаларды жөндеу және арнайы техниканы жаңарту да жоспарланған. Кәріз суларын тазарту станцияларындағы тазалау технологиясын жаңарту жобалары басталды. Кәріз суларын тазарту алаңында шөгінділерді өңдеу құрылыстары салынбақ.