Қазақстанның техникалық және кәсіптік білімі тарихи серпіліс жасады. ALMATY POLYTECHNIC COLLEGE студенттері АҚШ-та өткен робототехникадан FIRST Tech Challenge World Championship 2026 әлем чемпионатынан абыроймен оралды, – деп хабарлайды aqshamnews.kz тілшісі.
Хьюстон төрінде олар Қазақстанның озық технологиялар көшінде келе жатқанын және осы саланың жаңа бағыттарын айқындай алатынын паш етті.
Биылғы Хьюстон додасы барлық құрлықтан мыңдаған қатысушыны жинады, бірақ алматылықтар финалдың басты кейіпкерлеріне айналды. Колледждің қос құрамасы — KAP және TGJ — беделді Reach Award аталымында бірінші және үшінші орындарды иеленді. Бұл марапат STEM-технологияларды насихаттауға қосқан ерекше үлесі мен жоғары инженерлік шеберлігі үшін беріледі.
Орталық Азиядан әлем шыңына дейін
Бұл жетістік кездейсоқ емес. Хьюстондағы жеңіске жол Central Asia FIRST Championship аймақтық чемпионатынан басталды. Дәл осы Алматыда өткен ауқымды додада біздің командалар Орталық Азияның ең мықтыларымен сайысқа түсіп, өздерінің техникалық шешімдерін шыңдады. Бұл чемпионат жігіттерге әлемдік аренаға жолдама беріп қана қоймай, үлкен тәжірибе мектебі болды.
Еске сала кетейік, 2026 жыл Қазақстанда Президенттің Жарлығымен Цифрландыру және жасанды интеллект жылы болып жарияланған. Студенттердің жеңісі — елдің жаһандық ЖИ және робототехника нарығында бәсекеге қабілетті кадрлар тәрбиелеп отырғанының айқын дәлелі.
Бұл жеңіс қандай мүмкіндіктер береді?
Техникалық және кәсіптік білім беру жүйесі үшін бұл — тарихи оқиға. Жеңімпаздарды алда үлкен мүмкіндіктер күтіп тұр:
— Жаһандық мансап: FIRST жеңімпаздарын MIT, Stanford университеттері мен Google, NASA секілді алпауыт корпорациялар мойындайды.
— Кәсіби дағдылар: Командада жұмыс істеу, қатаң мерзімде шешім қабылдау және күрделі инженерлік міндеттерді орындау қабілеті бүгінгі нарықта алтынмен тең.
— Халықаралық байланыс: Студенттер АҚШ, Үндістан және Вьетнамнан келген жас инженерлермен байланыс орнатып, болашақ стартаптарға негіз қалады.
ALMATY POLYTECHNIC COLLEGE директоры Медет Омарбеков: «Цифрландыру және жасанды интеллект жылында біздің студенттеріміз технологиялық державалармен терезесі тең сайысты. Бұл біздің колледжде әлемдік стандартқа сай мамандар даярланатынын көрсетті. Шәкірттеріміздің қазақстандық робототехника тарихында жаңа парақ ашқанын мақтан тұтамыз», — деп атап өтті.