Алматыда БЦП, Даун синдромы және аутизммен ауыратын балалар Қазақ мемлекеттік циркі базасында тегін иппотерапия курсынан өтуге мүмкіндік алды. Бұл жайында қаланың Мәдениет басқармасы мәлімдеді.
Қарапайым қимыл-қозғалыс жасау және қоршаған ортамен байланыс орнату қиынға соғатын балалар үшін жылқылармен қарым-қатынас оңалудың жаңа жолын ашты. Көпшілік үшін бұл жай ғана алғаш рет атқа міну емес, ерекше әрі қуанышты сәт болды.
Иппотерапия – қимыл-қозғалыс қабілетін, үйлестіруді, зейін мен өзіне деген сенімділікті арттыруға бағытталған ғылыми тұрғыдан дәлелденген оңалту әдісі. Цирктегі мұндай сеанс баланың есінде ұзақ сақталатын әсерлі әрі жылы естелікке айналады.
Сабақты арнайы дайындықтан өткен кәсіби иппотерапевт мамандар жүргізді. ҚазМемЦирктің Nomad Stunts командасы жаттығу үшін балаларға арнайы үйретілген жуас жылқылар әкелді.
«Жылқы баланың әрбір қимылын, ішкі күйін аңғарады. Ол бала үшін досқа, серікке айналады. Біз әр баланың өзіне деген сенімділікті сезінуіне мүмкіндік беретін қауіпсіз орта жасаймыз. Біздің цирк қайырымдылық қойылымдармен шектелмей, иппотерапияны да өткізеді. Балалармен жұмыс істеу біз үшін үлкен мәртебе әрі қуаныш», - деді цирк артисі, Nomad Stunts командасының жетекшісі Қанатбек Күнғожинов.
Иппотерапияға алғаш рет қатысқан жеті жастағы Әлімнің анасы бұл тәжірибенің ұлы үшін шынайы серпіліс болғанын айтты.
«Әлім кішкентай кезінен адамдармен араласуда, эмоциясын білдіруде қиындық көріп келді. Алғашқы сеанс болғанына қарамастан, ол атқа қуана мініп, шеңберді бірнеше рет айналды. Оның жүзіндегі күлкі мен сенімді қимыл мұндай жаттығудың қаншалықты маңызды екенін дәлелдеп тұр. Бұл – балам үшін нағыз серпіліс. Осындай игі іс-шараны ұйымдастырып, қатысу мүмкіндігін бергендеріңізге алғысым шексіз», – деді Меруерт Сәрсенғалиева.
Балалар иппотерапия сабақтарына «АРДИ» мүмкіндігі шектеулі балалардың ата-аналарының қауымдастығы мен әлеуметтік қызмет көрсету орталықтары арқылы шақырылады. Бүгінге дейін Алматы циркі базасында 40-қа жуық бала тегін иппотерапия курсынан өтті.