Алматыда 2022–2024 жылғы III шақырылымдағы Қоғамдық кеңестің жұмысын қорытындылады, деп хабарлайды aqshamnews.kz.
Бұл жөнінде өңірлік коммуникациялар қызметінде өткен баспасөз конференциясында «Ақпараттың ресурс орталығы» ҚҚ директоры, Алматы қаласының Қоғамдық кеңесінің төрағасы Алтынай Көбеева хабарлады.
Оның айтуынша, 3 жылда Қоғамдық кеңес 40 жалпы отырыс өткізіп, онда 61 өзекті мәселені қараған. Президиумның 26 отырысын, комиссияның ай сайынғы бес кездесуін өткізген. Соның арқасында кеңестің құрамына резервтегі тізімде тұрған 15 адам қосылған жаңадан.
«Біз осы уақыт аралығында сегіз аудандық әкімдіктің, 76 мемлекеттік органның, мекемеге қарасты 61 ұйымның есебін тыңдадық. Оның көбіне ұсыныс әзірлеп, қазір солар жүзеге асып жатыр»,- деді Алтынай Көбеева. 2023 жылғы сәуір айынан 2025 жылғы наурыз айына дейін сегіз ауданда 176 диалог өтіп, оған 5292 адам қатысты. Олар – кеңес мүшелері, эксперттер, мемлекеттік қызметтің өкілдері мен қала тұрғындары.
Эксперттік топ ерекше назар аударған бағыттың бірі — соңғы үш жылда 85 қоғамдық мониторинг өткізіліп, 262 нормативтік құқықтық актіге сараптама жасалды.
Сонымен бірге экология, денсаулық сақтау, рухани тәрбие, қоғамдық көлік, сервистік полицияға қатысты ең маңызды мәселелер қаралған 6 қоғамдық тыңдау ұйымдастырылып, 28 дөңгелек үстел, қала және аудан әкімдерімен 140 кездесу өтті.
«Қоғамдық кеңес – қала тұрғындарының алаңдатқан қоғамдағы түйіткілді әрі өзекті мәселелерді шешетін маңызды алаңға айналды. Үш жылда қала тұрғындары мен заңды тұлғалардан 891 өтініш түсіп, 795 өтінішке нақты жауап берілді»,- деп толықтырды Көбеева.
Басқармалардың бюджетіне мониторинг жасаудан бастап әлеуметтік маңызы бар мәселелерге ұсыныс енгізуге дейінгі дүниелерді қамтыған 18 іс-шара өткізілді. Ақпараттық жұмыс жүргізіліп, ресми сайт пен әлеуметтік желіге 1366 мақала шықты. Кеңес мүшелері де өзінің жеке парағында жұмыс барысын көрсетіп отырды.
«Қоғам мен биліктің арасында дәнекер болып, байланыс орнатуда Қоғамдық кеңестің орны ерекше екенін уақыттың өзі дәлелдеді. Қаланы қолдан келгенше алматылықтарға қолайлы етіп, ізгілендіру үшін кез келген адамның арыз-шағымын аяқсыз қалдырмауға барымызды салып жатырмыз», - деп түйіндеді Алтынай Көбеева.