Бұл туралы өзінің инстаграм парақшасында хабарлаған шаһар басшы Дархан Сатыбалды құрылыс-монтаж жұмыстары аяқталғанын айтты, деп хабарлайды aqshamnews.kz тілшісі.
Атап айтқанда, Көкқайнар шағынауданындағы №5 автобус паркінде электробустарға арналған қуаттау станцияларын орнату жұмыстары жүріп жатыр. Мұнда бір мезетте 200-ге дейін электробусты қуаттауға мүмкіндік беретін 100 станция орнатылады. Автопарк «Алматыэлектротранс» балансына берілген соң олар қалалық электр көлігіне қызмет көрсету үшін пайдаланылады.
Сондай-ақ, автобустарға арналған жаңа газ құю станциясының құрылысы да қарқынды жүріп жатыр. Оның қуаты сағатына 4 400 текше метр газ. Мұнда бір уақытта алты автобусқа, ал орта есеппен сағатына 30-ға дейін көлікке газ құюға болады.
Негізгі құрылыс-монтаж жұмыстары аяқталды. Қазір инженерлік желілерге қосу, жабдықтарды орнату және қасбетті әрлеу жұмыстары қолға алынған.
"Қалған жұмыстарды созбалаңға салмай, нысандарды белгіленген мерзімде аяқтауды тапсырдым", деп атап өтті мегаполис әкімі.