2025 жылдың 21 қаңтарында Алматы қаласының Әділет департаменті Apple өнімдерінің тауар белгілерінің заңсыз пайдаланылуы бойынша «Д» кәсіпкерлік субъектісіне қатысты жоспардан тыс тексеру жүргізді.
Тексеру барысында 1300-ден астам бірлік контрафактілік өнім анықталды, жалпы сомасы 5 600 000 теңгеден асты. Өнімнің сапасы күмән тудырып, өндіріс орнының ресми шығу тегі жоқ екені байқалды, деп хабарлайды aqshamnews.kz.
Әділет департаменті зияткерлік меншікті қорғауға және контрафактілік өнімнің айналымына жол бермеуге ерекше назар аударады. Контрафактілік өнім құқық иеленушілерге, тұтынушыларға және жалпы экономикаға зиян келтіреді.
Қазіргі уақытта іс бойынша барлық материалдар Қазақстан Республикасының қолданыстағы заңнамасына сәйкес процессуалдық шешімдер қабылдау үшін сотқа жіберілді.
Алматы қаласының Әділет департаменті құқық иеленушілердің құқықтарын қорғау және кәсіпкерлік қызметте заңдылықты қамтамасыз ету мақсатында зияткерлік меншік саласындағы заң бұзушылықтарды анықтау және алдын алу бойынша жұмысын жалғастырады.