2026 жылғы 6 ақпанда Алматы қаласының Белсенді ұзақ өмір сүру орталығында «Алаяқтық: өзіңізді және жақындарыңызды қалай қорғауға болады» тақырыбында профилактикалық дәріс өтті. Іс-шара егде жастағы азаматтарды кең таралған алаяқтық схемалардан қорғауға бағытталды.
Аталған шараның мақсаты — зейнет жасындағы азаматтардың құқықтық және қаржылық сауаттылық деңгейін арттыру, сондай-ақ егде жастағы адамдарға қатысты алаяқтыққа байланысты құқықбұзушылықтардың алдын алу және профилактика жүргізу.
Іс-шараға Алматы қаласы бойынша Экономикалық тергеп-тексеру департаменті мен Алматы қаласы Полиция департаментінің қызметкерлері қатысып, алаяқтықтың ең жиі кездесетін түрлері, оларды анықтау жолдары және жеке қауіпсіздік шаралары туралы жан-жақты ақпарат берді. Дәріс «Заң және тәртіп» қағидатын іске асыру аясында өткізілді.
Кездесу интерактивті форматта өтіп, қатысушыларға нақты қылмыстық істерден алынған мысалдар көрсетілді, жәбірленушілер жіберетін типтік қателіктер талданды, сондай-ақ өздерін және жақындарын қорғауға арналған практикалық ұсынымдар берілді.Іс-шараға қатысушылар тақырыпқа үлкен қызығушылық танытып, белсенді түрде сұрақтар қойып, жеке тәжірибелерімен бөлісті.