Қаладағы бір қызметші департаментке іссапар шығындарының өтелмеуі туралы шағыммен жүгінді. Аталған шағым бойынша департамент мемлекеттік еңбек инспекторын тарта отырып, тексеру жүргізді. Айта кету керек, тексеру ағымдағы жылдың маусым айынан бастап қолданысқа енгізілген мемлекеттік қызмет саласындағы заңнаманың сақталуын бақылаудың жаңа тәртібі бойынша жүргізілді, деп хабарлайды aqshamnews.kz.
Тексеру барысында қолданыстағы заңнамада белгіленген мемлекеттік қызметшінің құқықтарының өрескел бұзылғаны анықталды. 40 күнге басқа қалаға іссапарға жіберілген қызметкерге жол жүру және тұрғын үй жалдау шығындары төленбеген. Ал Қазақстан Республикасының «Мемлекеттік қызмет туралы» Заңының 57-бабына сәйкес, мемлекеттік қызметшілерге қызметтік іссапарлар шығындары, оның ішінде шетелдік іссапарлар шығындары да Қазақстан Республикасы Үкіметі айқындайтын тәртіппен өтеледі. Мемлекеттік қызметшілерге заңнамада көзделген кепілдіктер және іссапарда болған уақытқа тәуліктік төлемдер, бару және қайту жол жүру шығындары, тұрғын үй жалдау шығындарын алу құқығы қолданылады.
Жүргізілген тексеру нәтижесінде департамент анықталған заң бұзушылықтарды жою және мемлекеттік қызметшінің бұзылған құқықтары мен кепілдіктерін қалпына келтіру туралы ұсыныс енгізді. Нәтижесінде, ұсыныс қаралып, мемлекеттік қызметшінің құқықтары қалпына келтіріліп, іссапар шығындары 745 784 теңге көлемінде төленді.
Қызметшілердің құқықтарын қорғау бойынша осындай мысалдар көп. Департамент алдағы уақытта да мемлекеттік қызметшілердің құқықтарын қорғау және қалпына келтіру бағытындағы жұмысын жалғастырады.
Алматы қаласы бойынша ҚР Мемлекеттік қызмет істері агенттігінің департаментінің бас маманы — Лаура Нұргелдіқызы Науқанбай