Күнделікті таңғы сағат 5-тен бастап жүргізілетін аралау аясында Алматы әкімінің орынбасары Алмасхан Сматлаев бірқатар нысандағы жұмыстардың барысын бақылап, жауапты құрылымдарға нақты тапсырмалар берді.
Әкімнің орынбасары әуелі Бостандық ауданындағы Әбіш Кекілбайұлы көшесінен Бокин көшесіне дейінгі кәріз желілерін қайта құру жұмыстарын көрді. Мұнда әкімнің орынбасары құрылыс алаңын көріп шығып, материалдардың сапасы мен инженерлік коммуникациялардың жай-күйін нақтылады. Сонымен қатар мердігерге жұмысты жеделдетуді тапсырды.
Сосын ол Жароков және Дунаевский көшелерінің қиылысындағы жылу желілерін қайта құру учаскесін аралады. Әкімнің орынбасары бұл жобаның тұрғын үйлерді сенімді жылумен қамту үшін стратегиялық маңызы бар екенін атап, жұмысты уақытылы орындауды әрі технологиялық ақауларға жол бермеуді қатаң тапсырды.
А. Иманов атындағы скверде (Мәметова көшесі – Желтоқсан көшесінің қиылысы) Алмасхан Сматлаев санитарлық мақсатта кесіліп жатқан ағаштарды көріп, жасыл желектердің жай-күйін тексерді. Әсіресе, қауіпсіздік мәселесіне және кесілген бұтақтарды уақытылы шығаруға ерекше көңіл бөлінді.
Алмалы ауданында ол Ғ. Мүсірепов атындағы балалар мен жасөспірімдер театры ғимараты жанындағы субұрқақты күрделі жөндеу барысымен танысты. Әкімнің орынбасары бұл нысанның қала тұрғындары мен қонақтары үшін маңызды демалыс орны екенін атап, оны қысқа мерзімде әрі сапалы түрде аяқтауды міндеттеді.
Сапар соңында Достық даңғылы бойындағы абаттандыру мен көгалдандыру жұмыстары жүріп жатқан аумақты аралады. Әкімнің орынбасары жаяу жүргіншілер аймақтарын аралап, төселіп жатқан жабынның сапасын, инженерлік шешімдердің дұрыстығын тексерді.
Сапар соңында Алмасхан Сматлаев барлық жұмысты белгіленген мерзімде аяқтап, қауіпсіздік пен көркейту жұмыстарына мән беруді тапсырды. Қаладағы өзгерістер халықтың күнделікті тұрмысынан анық байқалуға тиіс екенін атады.