2026 жылғы 5 ақпанда Алматы қаласында қала әкімінің орынбасары Абзал Нүкеновтің қатысуымен жұмыс кездесуі өтті. Кездесу аясында ол Қалалық білім берудегі жаңа технологиялардың ғылыми-әдістемелік орталығының қызметімен танысып, орталық әдіскерлерімен пікір алмасты.
Шара аясында әкімнің орынбасарына Әдістемелік орталықтың негізгі қызмет бағыттары, соның ішінде Қалалық инклюзивті ресурстық орталық пен Қалалық мектепке дейінгі ресурстық орталықтың жұмысы таныстырылды. Білім беру ұйымдарын әдістемелік сүйемелдеу тетіктері, сондай-ақ педагогтерге оқу-тәрбие процесі аясында көрсетілетін әдістемелік қолдау тәсілдері ұсынылды.
Талқылау кезінде әдістемелік жұмыстың мазмұнын жаңарту, аналитикалық құралдарды енгізу, цифрлық ресурстарды дамыту және білім беру ұйымдарының нақты сұраныстарын ескере отырып, нысаналы әдістемелік қолдауды күшейту мәселелеріне ерекше назар аударылды.
Алматы қаласы әкімінің орынбасары Әдістемелік орталықтың қызметі тұрақты білім беру нәтижелерін қамтамасыз етуде маңызды рөл атқаратынын және қаланың білім сапасын басқару жүйесіндегі негізгі құрылымдардың бірі екенін атап өтті.
Кездесу қорытындысы бойынша Әдістемелік орталықтың алдағы даму бағыттары айқындалып, басым міндеттер белгіленді. Білім беру саласындағы атқарылып жатқан жұмыстардың ілгерілеуін бағалау мақсатында келесі жұмыс кездесуін ағымдағы жылдың наурыз айында өткізу ұсынылды.