Алматы қаласы полиция департаментінің жаңа басшысы тағайындалды. Бұл қызметке бұған дейін Солтүстік Қазақстан облысы полиция департаментін басқарған Айдын Қабдұлдинов келді, деп хабарлайды Aqshamnews.kz тілшісі.
Аталған ақпаратты ҚР Ішкі істер министрлігінің баспасөз қызметі растады.
"Бұған дейін Солтүстік Қазақстан облысы полиция департаментінің бастығы қызметін атқарған полиция генерал-майоры Айдын Тоқтарұлы Қабдұлдинов Алматы қаласы полиция департаментінің бастығы болып тағайындалды", – делінген министрлік хабарламасында.
Бұған дейін Алматы қалалық полиция департаментін Арыстанғани Заппаров басқарған.
Айдын Қабдұлдинов – полиция генерал-майоры. Ішкі істер органдарындағы қызметін Өскемен қалалық ІІБ-да тергеуші ретінде бастаған. 2000 жылдан бастап Алматы қаласының ішкі істер бөлімшелерінде қызмет атқарған.
2004 жылдан бері Алматы қалалық ІІД-ның ішкі қауіпсіздік басқармасында әр жылдары тергеуші, жедел уәкіл және бөлім басшысы лауазымдарын атқарған. 2012 жылы – ішкі қауіпсіздік басқармасы бастығының орынбасары, 2017 жылдан бастап осы бөлімшенің басшысы болған. Сондай-ақ Батыс Қазақстан облысы ПД-ның ішкі қауіпсіздік басқармасын басқарған.
2020 жылғы 23 сәуірде Алматы қаласы полиция департаменті бастығының орынбасары болып тағайындалса, 2022 жылдың қаңтар айының соңынан бүгінге дейін СҚО полиция департаментін басқарған.