Дүниежүзілік қатерлі ісік күні алдын алу, тұрақты тексерілу және дер кезінде ем қабылдаудың маңызын тағы бір еске салады, - деп хабарлайды Aqshamnews.kz.
Бүгінде Алматы онкологиялық орталығы ерте диагностикаға, аз инвазивті технологияға және медициналық көмектің дәлдігі мен қауіпсіздігін арттыратын цифрлық шешімдерге басымдық беріп отыр. Бұл туралы Алматы қалалық Денсаулық сақтау басқармасының өкілдері айтты.
2025 жыл орталық үшін технологиялық жаңғыру мен тұрақты даму кезеңі болды. Диагностикалық және емдеу мүмкіндіктері кеңейтіліп, заманауи жабдықтар енгізілді, пациенттерді қамту ауқымы артты.
Бір жыл ішінде орталықта 57 мыңнан астам КТ және МРТ зерттеуі, 7,5 мыңға жуық эндоскопиялық тексеру, 13 мыңнан астам иммуногистохимиялық талдау жүргізілді. Мұндай көлем дәл диагноз қоюға және әр науқасқа жеке ем тактикасын таңдауға мүмкіндік береді.
Маңызды технологиялық жаңалықтардың бірі Kiro Robotics компаниясының KiroOncology роботтандырылған химиопрепарат дайындау жүйесінің енгізілуі. Алматы бұл шешімді қолданған елдегі алғашқы қала атанды. Робот дәрінің дозасын дәл есептеп, препараттарды сәйкестендіріп, емнің әр кезеңін автоматты бақылауға алады. Бұл адами қателікті азайтып, пациенттер мен медицина қызметкерлері үшін қауіпсіздікті арттырады.
Цифрлық технология диагностикада да кеңінен қолданылады. Сараптамалық деңгейдегі ультрадыбыстық аппараттар жасанды интеллектпен біріктірілген. Жүйе кескіндерді нақты уақыт режимінде талдап, тіндердің құрылымын, тығыздығын және зақым ошағының шекарасын бағалайды. Қажет болған жағдайда дәрігерге қосымша назар аударуды қажет ететін аймақтарды көрсетеді. Бұл ерте кезеңдегі патологияны анықтауға мүмкіндік береді.
Аталған технология сүт және қалқанша бездерін тексеруде қолданылады, ал бауыр ауруларын диагностикалауға кезең-кезеңімен енгізіліп жатыр. Мысалы, майлы гепатозды анықтауда жүйе өзгерістерді тіркеп қана қоймай, сандық көрсеткіштерді де ұсынады. Бұл зақым деңгейін объективті бағалап, науқас жағдайының динамикасын бақылауға жол ашады.
Жасанды интеллект алгоритмдерін жетілдіру үшін медициналық кескіндердің ауқымды дерекқоры жасалып жатыр. Оңтүстік Корея мамандарымен бірлесіп, мыңдаған ультрадыбыстық сурет жиналып, таңбалануда. Оқыту аяқталғаннан кейін жүйе халықаралық стандарттарға сәйкес клиникалық сынақтан өтеді. Жоғары дәлдікке қол жеткізу үшін кемінде 10 мың зерттеу қажет.
Өткен жылы осы технологияның көмегімен 6 мыңнан астам сүт безі, 100-ден астам қалқанша безі тексерілді. Сүт безі қатерлі ісігінің 128 жағдайы, 5100 қатерсіз өзгеріс, сондай-ақ қалқанша безі қатерлі ісігінің 12 жағдайы анықталды.
Емдеу бағыттары да айтарлықтай кеңейді. Жыл ішінде 27 мыңнан астам пациент мамандандырылған көмек алды. 3 мыңнан астам ота жасалып, оның 53,2%-ы аз инвазивті тәсілмен орындалды. Мұндай әдістер жарақатты азайтып, ауруханада жату мерзімін қысқартады және қалпына келуді жеделдетеді. Аз инвазивті хирургия өкпе, эндометрия, бүйрек, бүйрек үсті бездері, қуықасты безі мен қуық ісіктерінде белсенді қолданылады.
23 мыңға жуық пациент химиотерапия алды, мыңдаған науқас амбулаториялық дәрімен қамтылды. Мыңнан астам адам сәулелік терапиядан өтті. Рентгенологиялық бөлімшеде ісікке дәл әсер етіп, сау тіндерді барынша қорғауға мүмкіндік беретін ExacTrac Dynamic стереотактикалық технологиясы енгізілді.
Ерте диагностика – басты басымдықтардың бірі. Орталықта қатерлі ісіктерді бастапқы сатысында анықтау көрсеткіші республика бойынша ең жоғары деңгейдің қатарында. Бұл емдеуді дер кезінде бастап, өлім-жітімді азайтуға ықпал етеді.
Жасанды интеллект, роботтандыру және заманауи жабдықтар онкологиялық көмектің жаңа моделін қалыптастырып келеді. Ол дәл, қауіпсіз және пациентке бағытталған медициналық қызмет. Бүгінде мұндай шешімдер қатерлі ісікпен күресте шешуші рөл атқарады.