Оңтүстік Кореяда Чеджудо аралында әлемдік саясаткерлердің халықаралық форумы өтті.
Лондон, Нью-Йорк, Аргентина, Калифорния, Сербия, Канада, Вашингтон, Мәскеу және басқа да қалалардан келген саясаткерлер бір алаңға жиналды. Алқалы жиында сенаторлар, мэрлер, депутаттар, әр түрлі елдердің Парламент жанындағы кеңес төрағалары заң саласындағы тәжірибелерімен бөлісіп, баяндамалар оқыды, деп хабарлайды Almaty-akshamy.kz Жетісу медиаға сілтеме жасап.
Қазақстанның атынан Алматы облыстық мәслихатының VII шақырылымының депутаты Дамир Дигай қатысты.
«Алғаш рет осындай ауқымды халықаралық деңгейде ағылшын тілінде сөйледім. Бұл форумға ұятқа қалмау үшін тыңғылықты дайындалдым. Біздің саяси жүйемізді таныстырдым. Nur Otan партиясының «Primaries» партияішілік іріктеуі туралы, өткен сайлау барысы жайында егжей-тегжейлі айттым. Бізде депутаттық корпус айтарлықтай жаңарып, оның құрамына әйелдердің 30%-ы мен жастардың 20%-ы кірді. Бұл да халықаралық саяси форумда тілге тиек етілді. Nur Otan партиясы жанындағы республикалық қоғамдық кеңестердің құрылуы мен маңыздылығы жайлы да мәлімет беріп өттім», - дейді депутат.
Жас депутат сондай-ақ «Қазақстан халқы Ассамблеясы» институты туралы түсіндіріп, оның Қазақстан Республикасы Президентінің жанындағы бірегей орган екенін, басты міндеті мемлекеттік ұлттық саясатты әзірлеуге және іске асыруға ықпал ету болып табылатындығын алты құрлық алдында атап өтті.
Аталған форумның мақсаты саясаткерлердің түрлі елдердің саяси жүйесінің тәжірибесімен алмасуы, сондай-ақ болашақта кедергісіз тікелей ынтымақтасуға, тіпті әлемдік саясаткерлермен кеңесуге мүмкіндік беру болып табылады.