Күн сайын облыста жүзге жуық нәресте дүниеге келеді.
Қазіргі уақытта өңірдегі жалпы халық саны бір жарым миллион адамнан асты. Туу көрсеткішіне аналарды әлеуметтік жағынан қолдау да оң әсер етіп отыр, деп хабарлайды Almaty-akshamy.kz 24.kz-ке сілтеме жасап.
Мира Садықова - көп балалы ана. Қазір алтыншы баласын күтіп жүр. Отбасымен екі бөлмелі пәтерде тұрады. Президенттің бала күтіміне берілетін әлеуметтік жәрдемнің және алты айға ұзартылғанын біледі. Мерзімімен бірге көлемі де артса деген үмітте.
«Бір жасқа дейін алатынбыз. Ұлғайтыпты. Ол көмек қой кәдімгідей балаға. Мемлекет тарапынан көп балалы ана ретінде әр балаға он сегіз жасқа дейін жәрдемақы аламын», - деді қала тұрғыны Мира Садықова.
Облыстық жұмыспен қамту басқармасының мәліметінше, өңірде 44 мыңнан астам ана бала күтіміне берілетін мемлекеттік жәрдемақы алады.
«Жәрдемақыны төлеу мерзімі көбейтіліп отыр және бұрын мұндай кезде жұмысқа адам шығып кетсе бір жылдан кейін жәрдемақысы тоқтатылатын. 23 жылдың бірінші қаңтарынан бастап жұмыс істесе де, істемесе де, жәрдемақысын алып отырады», - дейді облыстық жұмыспен қамту және әлеуметтік бағдарламалар басқармасының басшысы Айгүл Ахметова.
Жыл басынан бері Алматы облысында жиырма мың нәресте дүниеге келген. Бұл республика бойынша жоғарғы көрсеткіш саналады. Сол себепті Қонаев қаласында перинаталдық орталық салу қажет. Ал қалалық көпсалалы аурухананың перзентханасында күн сайын он бала туылады. Егіз босанып жатқан аналар да бар. Оларға білікті акушер мамандар жан жақты көмегін көрсетіп жатыр.
Заманауи медициналық құралдармен жабдықталған перзентхананы Қарасай ауданында да салу жоспарланып отыр. Өткен жылы ауданда сегіз мың бала дүние есігін ашты.