Жоба авторлары 1 млн теңге қайтарымсыз қаржы иеленді
«Жаңа бастамалар мен мүмкіндіктер». Алматы облысында үкіметтік емес ұйым өкілдері арасында өткен байқаудың жеңімпаздары анықталды. Сайысқа әлеуметтік бағыттағы жобалар түсті. Олардың арасынан үздік шыққан 10 жобаның авторы марапатталып, 1 млн теңге қайтарымсыз қаржы иеленді. Игі бастаманы облыстық Ішкі саясат басқармасы ұйымдастырып отыр, деп хабарлайды Almaty-akshamy.kz Almaty.tv-ге сілтеме жасап.
Жанат Медетқызы – жеке кәсіпкер. Қыз жасауы және құрақ көрпе тігумен айналысады. Қазір өзі секілді 50 көп балалы ананы тұрақты жұмыспен қамтып отыр. Ол бүгінгі байқауда жеңімпаз атанды. Енді қомақты қаржыға кәсібін кеңейтпек ниетте.
– Әр ананың қолынан тігін келе бермейді ғой. Сондықтан аспаздық жаққа, басқа да жаққа икемі бар аналарды жұмыспен қамту мақсатында цех ашып жатырмыз, – деді жеке кәсіпкер Жанат Қалжанова
Облыс әкімдігі ұйымдастырған байқауға 30-ға жуық үкіметтік емес ұйым өкілдері қатысқан. Олардың арасынан 10 жоба үздік деп танылды. Комиссия мүшелері ұсынылған бизнес-бағдарламалардың қоғамға тиімді тұсын басшылыққа ала отырып тағдаған.
– Осы үкіметтік емес ұйымдарда әдістемелік көмек көрсету мақсатында ақпарттық сүйемелдік жұмыстар, сонымен қатар құқықтық көмек көрсету мақсатында орталық бар. Жаңа бастамаларды қолдау мақсатында осы жоба үшінші рет ұйымдастырылып отыр, – деді Ішкі саясат басқармасының бас маманы Ұлан Боранбайұлы.
Алматы облысында 370-тен астам үкіметтік емес ұйым бар. Оның 100-і бүгінде түрлі бағытта белсенді жұмыс істеп келеді. Облыстық Ішкі саясат басқармасының мамандары ізгі бастаманы қолдау алдағы уақытта да жалғасатынын айтты.