Қоқыс полигондарының басым бөлігі Алматыға жақын аудандарда анықталды.
Жер серігінен түсірілген суреттер арнайы бағдарламаға жүктеліп, жаңартылып отырады. Тек Талдықорған қаласы маңынан 40-тан астам осындай заңсыз полигон табылған, деп хабарлайды Almaty-akshamy.kz Qazaqstan.tv сайтына сілтеме жасап.
Мұны мамандар ешқайда шықпай-ақ, жер серігімен түсірілген суреттерден қарап біліп отырады. Биылдың өзінде 389 нүкте табылып, 59 лауазымды тұлғаға 4 млн теңгеден астам айыппұл салынды.
"Ғарыштық түсірілімдер ағымдағы жылдың қараша айына дейін жалғасатындықтан заңсыз қоқыс орындарының саны әлі де көбеюі мүмкін. Осыған сәйкес қазіргі таңда департаментпен тиісті шаралар қабылдануда", - деді Алматы облыстық экология департаментінің бас маманы Данияр Өмірбеков.
Талдықорғанда да жағдай мәз емес. 40 заңсыз полигон анықталды. Қоқысты арнайы орынға төгуге ерінген тұрғындар мен кәсіпорындар түнгі уақытты пайдаланып, қалдықтарды тау қылып үйіп кетеді.
Халық қоқысты төгеді. Оны жинау үшін қала әкімдігі бюджеттен қаржы бөледі. Жылда қайталанатын жағдай. Жергілікті билік қар еріп, қайта қар жауғанша осындай жабайылықпен алысып келеді.
"Биылғы жылы 15 млн теңге бөлінген. Бірақ конкурс бойынша 8,5 млн теңгеге келісімшарт жасалған. Қазіргі таңда 1400 тонна қоқыс шығарылған", - деді қалалық ТҮКШ бөлімінің бас маманы Рамиль Рахымбаев.
"Қала халқының жауапкершілігі оянбай мұндай жағдай жылда қайталана береді", - дейді сала мамандары. Ол үшін тиісті заңдарды да қатаңдату қажет деген пікірде.