Алматы онкологтары елімізде алғаш болып химиопрепараттарды дайындауға арналған роботтандырылған KiroOncology жүйесін енгізді.
Алматы қаласы Қазақстандағы технологиялық медицинаның флагманына айналуда. Елімізде алғаш рет Алматылық онкологиялық орталықта химиотерапиялық препараттарды дайындайтын KiroOncology роботтандырылған жүйесі іске қосылды. Бұған дейін мұндай технология Еуропа мен АҚШ клиникаларында ғана қолданылған еді. Бұл туралы Алматы қаласы өңірлік коммуникациялар қызметінің алаңында өткен баспасөз мәслихатында қала әкімінің орынбасары Нұрлан Әбдірахым мәлімдеді.
Сондай-ақ елімізде алғаш рет Алматы қаласындағы №3 емханада жасанды интеллект негізінде жұмыс істейтін дауыстық роботтар іске қосылды. Олар тіркеуші қызметін атқарып, пациенттердің өтініштерін қабылдап, кеңес береді және жүктемені автоматты түрде бөледі. Алдағы уақытта бұл тәжірибе барлық қалалық емханаларға енгізілмек.
«Алматы медицина саласын дәлірек, қауіпсіз әрі қолжетімді ететін заманауи технологияларды енгізіп келеді», – деді Нұрлан Әбдірахым.
Сонымен қатар, Қалалық кардиологиялық орталық базасында алғаш рет қалалық деңгейде жүрек трансплантациясы бойынша ота жасауға дайындық жүргізілуде.
Кадрлық әлеуетке де ерекше назар аударылған. Қала әкімінің орынбасарының айтуынша, жыл сайын қаланың медицина мекемелеріне 400 жас маман келіп, тұрғын үймен және әлеуметтік кепілдіктермен қамтамасыз етіледі. Сондай-ақ, сұранысқа ие бағыттар бойынша 124 дәрігер резидентураға жіберілді.