Алматы lifestyle-туризм бағыты ретінде мәртебесін нығайтып келеді: демалыс пен бос уақытқа арналған сапарлар үлесі артып отыр, – деп хабарлайды aqshamnews.kz тілшісі.
Алматы өңірдегі жетекші туристік орталықтардың бірі ретіндегі мәртебесін нығайтып, демалыс пен бос уақытқа арналған сапарлар бағыты ретінде барған сайын тартымды бола түсуде. Бұл жайт Almaty Tourism Bureau мен Mastercard Tourism Insights бірлесіп дайындаған 2025 жылға арналған Алматы туризмі жөніндегі аналитикалық есепте айқын көрініс тапты.
Зерттеу нәтижесіне сәйкес, Алматыға келетін туристер арасында рекреациялық туризмнің үлесі едәуір артқан. 2025 жылы қала қонақтарының 84%-ы Алматыға жеке мақсатпен, яғни тынығу, серуендеу және бос уақытын мазмұнды өткізу үшін келген. Бұл көрсеткіш былтырмен салыстырғанда 5 пайыздық тармаққа жоғары.
Мұндай өсім Алматының туристік келбеті өзгеріп келе жатқанын көрсетеді. Қала біртіндеп lifestyle-туризмнің тартымды бағытына айналып келеді. Мұнда табиғи ландшафттар, белсенді демалыс мүмкіндіктері мен бай мәдени орта үйлесім тауып, саяхатшылар үшін ерекше тәжірибе қалыптасып отыр.
Орталық Азия мен Кавказдағы Ташкент, Баку, Тбилиси және Бішкек қалаларымен салыстырғанда, бұл үрдіс жалпы өңірге ортақ болғанымен, Алматыда айрықша айқын байқалады. Бұл қаланың табиғи және рекреациялық әлеуетіне деген тұрақты сұраныстың жоғары екенін аңғартады.
Есепте туристік сапар форматының да өзгеріп жатқаны көрсетілген. Жеке саяхаттаушылар әлі де ең ірі сегмент болып қалып отыр, олардың үлесі шамамен 37%. Дегенмен, бұл көрсеткіш біртіндеп төмендей бастаған. Ал ең қарқынды өсім отбасылық туризм сегментінде тіркеліп, 2024 жылмен салыстырғанда 2,4 пайыздық тармаққа артқан.
Алматыдағы туристік сапар құрылымы:
— 37% — жеке саяхаттаушылар
— 22% — жұп болып саяхаттаушылар
— 21% — отбасылық сапарлар
— 20% — достармен жасалатын сапарлар
Сонымен қатар, топтық туризмнің 3 пайыздық тармаққа өсуі туристік сұраныстың кеңейіп, сапар форматының әртараптанып келе жатқанын көрсетеді.
Сарапшылардың пікірінше, мұндай үрдіс Алматының белсенді демалысқа бейім қала ретіндегі болмысына толық сәйкес келеді. Қаланың табиғи байлығы, тау бағыттары, гастрономиялық ерекшеліктері мен мәдени өмірі туристерге жеке сапардан бастап отбасылық және достық туризмге дейінгі әртүрлі форматта саяхаттауға мүмкіндік береді.
Жалпы алғанда, 2025 жылғы талдау қорытындылары Алматыға деген қызығушылықтың тұрақты түрде артып келе жатқанын дәлелдейді. Қаланың туристік әлеуеті табиғи және рекреациялық ресурстар негізінде қарқынды дамып келеді. Ал Азия нарықтарынан келетін сұраныс туристік өсімнің негізгі қозғаушы күштерінің біріне айналып отыр.