Архитектура, дизайн және инженерия колледжі еңбек нарығының заманауи талаптарын ескере отырып, білім беру бағдарламаларын жетілдіруді жалғастыруда. 2025 жылғы «Жұмысшы мамандықтар жылына» сәйкес колледжде екі жаңа бағыт ашылады, деп хабарлайды aqshamnews.kz
Бірі – ғимараттарды жобалаудың және пайдаланудың автоматтандырылған жүйелері (BIM-технологиялар) болса, екіншісі – лифт шаруашылығы мен эскалаторлар. Бұл туралы өңірлік коммуникациялар қызметінің баспасөз конференциясында колледж директоры Камал Жамангозов мәлімдеді.
Оның айтуынша, халықаралық стандарттарға сәйкес қайта даярлау және біліктілікті арттыру бағдарламаларын құру бойынша қосымша жұмыстар жүргізілуде. 2025 жылдың қаңтарында Қытайдың Юбэй білім беру орталығымен ынтымақтастық туралы меморандумға қол қойылды, бұл студенттер мен оқытушыларға тәжірибе алмасу және тағылымдамадан өту үшін жаңа мүмкіндіктер ашады.
«Жас Маман» жобасының арқасында колледж құны 170 миллион теңгеден астам заманауи құрал-жабдықтарға ие болды. 2023 жылы «Технониколь» құрылыс академиясымен бірлесіп, 120 миллион теңге инвестиция тартылған халықаралық құзырет орталығы ашылды.
«Технониколь» компаниясы жыл сайын оқу процесіне қажетті шығын материалдарына шамамен 12 млн теңге бөледі. Орталық ашылғаннан бері 2320 адам қысқамерзімді оқудан өтті, ал 2025 жылы кемінде 2600 маман даярлау жоспарланып отыр.
Сондай-ақ «Жұмысшы мамандықтары жылы» аясында колледжде OXYPROP (Қытай), Flugger (Дания) және Vetonit (Франция, Saint-Gobain концерні) халықаралық брендтерімен бірлескен сырлау ісі мектебін ашылды. . Қазіргі уақытта Saint-Gobain компаниясымен құрылыс технологиялары саласында құзыреттілік орталығын құру бойынша келіссөздер жүргізілуде.