Алматыда дөңгелек үстел өтіп, оның барысында салалық және жергілікті кәсіподақ төрағалары 2026 жылғы 6 ақпандағы Қазақстан Республикасы Кәсіподақтар федерациясының конституциялық реформаны және референдум өткізуді қолдау жөніндегі Үндеуін қолдады.
Өз сөзінде Алматы қаласы Кәсіподақтар орталығының төрағасы, қалалық мәслихат депутаты Зауреш Өмірбаева:
«Қазақстан Республикасы Конституциясының жаңа редакциясы ашық түрде және кең ауқымды сарапшылар құрамының қатысуымен әзірленуде. Бұрын жоба он шақты маманның қатысуымен дайындалса, бүгінде талқылауға шамамен 130 адам, оның ішінде 20 заңгер мен қоғамдық кеңестердің өкілдері тартылды. Талқылау ашық форматта өтіп жатыр, әрбір азамат ұсынылып отырған өзгерістермен таныса алады. Біз “әркімнің еңбек етуге құқығы бар” деген тұжырымнан бастап “лайықты еңбекке құқық” деген нұсқаға дейін түрлі формулировкаларды қарастырдық. Қорытынды мәтінге сарапшылар қолдаған нормалар енгізілді», – деп атап өтті.
"Бүгін Алматы кәсіподақтары атынан жаңа редакцияны қолдау туралы үндеу білдіріп отырмыз. Бұл – халықтың әл-ауқатын арттыруға, билік пен қоғам арасындағы байланысты жақындатуға бағытталған реформа. Маған ерекше ұнағаны – «Құрылтай» ұғымының енгізілуі. Қазақ халқы үшін бұл тарихи тұрғыдан жақын, түсінікті атау. Бір палаталы парламент 145 депутаттан тұрады деп көрсетілген. Меніңше, бұл шешім қабылдау үдерісін жеделдетеді. Сондай-ақ вице-президент лауазымының енгізілуін маңызды қадам деп санаймын. Бұл – президенттен кейінгі жоғары мемлекеттік қызмет. Қажет болған жағдайда ол президенттің өкілеттігін толық атқара алады. Сонымен бірге мемлекет басшысының жүктемесін азайтуға ықпал етеді. Бұрынғы Қазақстан халқы ассамблеясына да жаңа өкілеттіктер беріліп отыр. Заң шығару бастамасына қатысу мүмкіндігі кеңейеді. Бұл еліміздегі түрлі ұлт өкілдерінің мемлекеттік шешімдер қабылдау үдерісіне белсенді араласуына жол ашады.Жалпы, бұл өзгерістер халық мүддесіне бағытталған деп есептеймін", - дейді Данияр Алтыбаев,«Алматы халықаралық әуежайы» АҚ қызметкерлерінің жергілікті кәсіподақ ұйымының төрағасы.
Барлық қатысушы Конституцияға енгізілетін түзетулер парламенттің рөлін күшейтуге және билік тармақтары арасындағы тепе-теңдікті қалыптастыруға бағытталған деген ортақ пікірге келді.