Бүгін, 9 қаңтарда Алматыда қазақстандық актер Мұрат Бисембинді ақтық сапарға шығарып салу рәсімі өтіп жатыр, деп хабарлайды Aqshamnews.kz тілшісі.
Қоштасу рәсімі сағат 10:00-де Алматының Орталық мешітінде (мекенжайы: Пушкин көшесі, 16) басталды. Дата, уақыт және орын туралы мәліметті актердің қызы хабарлаған.
Мұрат Бисембин 54 жасқа қараған шағында дүниеден өтті. Ол отандық кинодағы рөлдерімен көпшілікке кеңінен танылып, харизмасымен және есте қаларлық экрандық бейнелерімен көрерменнің ықыласына бөленген. Әсіресе «Рэкетир» фильміндегі Руслан рөлі актердің танымалдығын арттырып, оны қазақстандық кино өнеріндегі ең беделді тұлғалардың біріне айналдырды.
Марқұмның әріптесі Жан Байжанбаевтың айтуынша, актер бір жылдан астам уақыт онкологиялық дертпен күрескен. Соңғы кезде жағдайы күрт нашарлап, шұғыл иммунотерапия қажет болғанымен, дәрігерлердің және жақындарының күш-жігеріне қарамастан, оны аман алып қалу мүмкін болмаған.
Мұрат Бисембин 1972 жылы 11 қазанда Қызылордада туған. Алдымен политехникалық институтты ауыл шаруашылығының инженер-механигі мамандығы бойынша тәмамдағанымен, кейін актерлік жолды таңдаған. Өнер иесі отбасылы, үш баланың әкесі болған.
