Мемлекет басшысының тапсырмасы мен 2025 жылғы желтоқсанда бекітілген стратегиялық құжаттарға сәйкес, Алматыда цифрландыруды дамыту мен жасанды интеллект технологияларын енгізу бойынша жүйелі жұмыс жүргізіліп жатыр. 2026 жыл ресми түрде Цифрландыру және жасанды интеллект жылы деп жарияланып, бұл елдің технологиялық тұрғыда жаңғырып, орнықты әрі тұрғындар үшін қолайлы қалалық ортаны қалыптастыруға бағытталған стратегиялық бағытын айқындайды.
Алматының цифрландыру басқармасы басшысының орынбасары Мейрам Дүйсековтің айтуынша, 2026–2030 жылға арналған Smart City Алматы даму стратегиясы мен әкімдіктің Цифрлық трансформация картасында негізгі басымдық бекітілген. Бұл құжаттар көлік пен тұрғын үй-коммуналдық шаруашылықты, қоғамдық қауіпсіздік пен экологияны, денсаулық сақтау мен білім беруді, мәдениет пен туризмді, инновациялық экономика мен электрондық сервисті дамытуды қамтыған.
Интеллектуалды көлік жүйесін дамытуға ерекше көңіл бөлінген. Цифрландыру басқармасының мәліметінше, Алматының Көлік холдингі қоғамдық көліктің қозғалысын диспетчерлеу мен бақылауды қамтамасыз етеді: автобустар бейнекамерамен, GPS-трекермен жабдықталған. ONAY қосымшасы арқылы бірыңғай электрондық төлем жүйесі жұмыс істейді.
Алдағы уақытта банк карталары арқылы, сондай-ақ Apple Pay мен Samsung Pay сервистері арқылы жолаушыларға ыңғайлы болуы үшін төлемнің балама тәсілін іске қосу жоспарланып отыр.
2026–2027 жылы қаладағы 1 188 аялдамаға электрондық таблолар орнатылады. Интеллектуалды көлік жүйесі де енгізіліп, кейін ол қаланың Цифрлық сыңарымен біріктіріледі. Бұл көлік ағынын уақытылы талдауға, жүктемені болжап, жолдағы жағдайды жедел басқаруға мүмкіндік бермек.
Жүргізушісіз көлік бағдарламасының пилоттық түрінің іске қосылуы ең ауқымды жобаның бірі болды. Yandex Kazakhstan компаниясымен бірлесіп, биылғы 1 мамырға дейін қаланың жолдарына жүргізушісі жоқ 50 автокөлікті шығару жоспарланып отыр.
Мейрам Дүйсековтің айтуынша, мұндай шешімдерді енгізу қаланың инновациялық экожүйесін қалыптастырудағы маңызды қадам болып, Алматының технологиялық тартымдылығын арттыра түспекші.
Аталған бастамаларды жүзеге асыру тұрғындардың өмір сапасын арттыруға бағытталған ақылды, қауіпсіз және технологиялық тұрғыдан дамыған қаланы қалыптастыруды көздейді.