Алматы әкімі Дархан Сатыбалды Франция Республикасының Қазақстандағы Төтенше және Өкілетті Елшісі Сильван Гиогемен кездесті.
Кездесуде экономика, кәсіпкерлікті дамыту, мәдени-гуманитарлық байланыстар, сондай-ақ көлік инфрақұрылымы, қалалық ортаны жаңғырту және мегаполисте жайлы өмір үшін заманауи шешімдерді енгізу мәселелері талқыланды.
Дархан Сатыбалды Алматы еліміздің ірі мегаполисі ретінде француз бизнесімен әртүрлі салаларда – туризм, қонақүй индустриясы, шағын және орта кәсіпкерлік бағытында серіктестікке ашық екенін атап өтті.
"Бүгінде Алматыда француз капиталының қатысуымен шамамен 60 кәсіпорын жұмыс істейді. 2005 жылдан бері Қазақстан экономикасына құйылған француз инвестициясының жалпы көлемі 20 млрд доллардан асты. Біз серіктестер үшін барлық жағдайды жасап отырмыз: қалада арнайы экономикалық және индустриялық аймақтар бар. Сонымен қатар мәдени-гуманитарлық байланыстар да белсенді дамуда. Алматыда француз тілі мен мәдениеті жоғары бағаланады. Қаламыздың іскерлік ортасы сергек, жаңашылдыққа ашық әрі сенімді серіктестікке ұмтылысымен ерекшеленеді", – деді Алматы әкімі Дархан Сатыбалды.
Өз кезегінде Сильван Гиоге Францияның білім, мәдениет және экономика салаларында ынтымақтастықты кеңейтуге және бірлескен жобаларды жүзеге асыруға мүдделі екенін жеткізді.
Кездесу соңында тараптар екіжақты байланыстарды нығайту және Қазақстан мен Францияны жақындастыратын жаңа бастамаларды дамыту ниетін растады.