Алматыда алдағы қала күніне арналған концерттер өтті
Шаралар ашық аспан астында ұйымдастырылды. «Арбатта» өткен «Алматы – махаббатым» атты концерт-спектакльде «Жаңа ғасыр» театрының қатысуымен танымал фильмдердің саундтректері мен театрландырылған көріністер ұсынылды.
- Репертуарымыз сүйікті қаламыз Алматының төңірегінде құрылған, - деп атап өтті «Жаңа ғасыр» театрының әртісі Мұхтар Қосыбай.
Концерт жастардың басын қосып, көрермендер әнге қосылып, би биледі. Сонымен қатар, дәл осы кеште мегаполисте тағы бір концерт – «Асыл Қазына» өтті. Бұл концерт дәстүрлі өнер театры «Алатау» алдында ұйымдастырылып, оған Рамазан Стамғазиев, Сауле Жанпейісова, Еркін Шүкіман, Амангелді Көзеубай және басқа да өнерпаздар қатысты.
Концерттер қала тұрғындары мен қонақтарына ерекше көңіл-күй сыйлап, қала күніне деген мерекелік атмосфераны күшейтті. Мәдени шаралар қаланың тарихын, мәдениетін насихаттап, оның рухани байлығын жаңғыртуға бағытталған.