Қаланың әлеуметтік-экономикалық дамуы туралы Өңірлік коммуникациялар қызметінде өткен баспасөз конференциясында Алматы қаласы әкімінің орынбасары Олжас Смағұлов мәлімдеді, деп хабарлайды aqshamnews.kz
Оның айтуынша, Алматы қарқынды даму үстінде. Экономикалық өсімнің негізгі драйверлері ретінде құрылыс, көлік және логистика, өңдеу өнеркәсібі аталды. Сонымен қатар, сауда мен байланыс қызметтерінің көлемі де артып келеді.
Олжас Смағұловтың айтуынша, мұндай нәтижелер жоғары іскерлік белсенділіктің, инвесторлар сенімінің артуының және салық түсімдерінің тұрақтылығының арқасында мүмкін болып отыр.
2025 жылы Алматыда қаланың жаңа экономикалық инфрақұрылымын қалыптастыратын бірқатар ірі жобалар жүзеге асырылды:
• Haval, Chery, Changan маркаларындағы көпбрендті автозауыт – инвестиция көлемі 203 млрд тг, жылдық қуаттылығы 120 мың автомобиль. 2025 жылдың шілдесінде іске қосылды;
• «Almaty Museum of Arts» – заманауи мәдени орталық (аумағы 10 мың шаршы метр, инвестиция көлемі 56 млрд тг), қыркүйек айында ашылды;
• Open Healthcare KZ медициналық орталығы – инвестиция 13 млрд тг, жылына 9 мың науқасқа қызмет көрсетуге есептелген, қыркүйек айында ашылды.
Бұл жобалар аясында жаңа инфрақұрылым құрылып, 1,5 мыңнан астам жаңа жұмыс орны ашылды.
