Алматы қаласында әлеуметтік инфрақұрылымды жаңғырту мен дамытуға айрықша көңіл бөлінуде, деп хабарлайды aqshamnews.kz
Бұл туралы қала әкімі Дархан Сатыбалды Қала күні мерекесінде сөйлеген сөзінде атап өтті.
“Биыл ұлттық жоба аясында 20 жаңа мектеп пайдалануға берілмек. Сонымен қатар 65 балабақша іске қосылады. Бұл қадам балаларымыздың сапалы білім алуына кең мүмкіндік ашады. Алдағы екі жылда денсаулық сақтау нысандары толық жаңғыртылып, қала тұрғындары үшін жаңа көпсалалы ауруханалар, заманауи перзентханалар мен поликлиникалар салу жоспарланған”, — деді Алматы әкімі Дархан Сатыбалды.
Әкімнің айтуынша, мәдениет пен спорт саласы да жаңа серпін алмақ. “Жақын арада 35 мың көрерменге арналған UEFA талаптарына сай келетін футбол стадионының құрылысы басталады. Қазіргі Орталық стадион жаңғыртылып, халықаралық стандарттарға сәйкестендірілмек. Сонымен қатар әлемге әйгілі «Медеу» кешені қайта құрылып, халықаралық деңгейдегі спорттық-туристік орталыққа айналады. Оның жылдық келушілер саны 1,5 миллион адамға дейін жетеді”, — деді қала басшысы.
Алматы әкімдігі тұрғындарға қолайлы жағдай жасау, сапалы білім мен денсаулық сақтау қызметін қамтамасыз ету, мәдениет пен спортты дамыту бағытындағы жобаларды жүйелі түрде жалғастыра бермек.