Алматы әкімінің орынбасары Алмасхан Сматлаев күн сайын таңғы сағат 5:00-те жұмыс сапарын нысандарды аралаудан бастайды. Мұндай кесте жобалардың орындалуын тұрақты бақылауда ұстап, туындаған мәселелер бойынша жедел шешім қабылдауға мүмкіндік береді, деп хабарлайды Аqshamnews.kz тілшісі.
Ең әуелі ол қала аумағында ұзындығы 23 шақырым болатын Д.Қонаев атындағы Үлкен Алматы каналының күрделі жөндеуімен танысты. Құрылыс 2026 жылы қазан айында аяқталмақ. Алмасхан Сматлаев бұл жобаның қала үшін стратегиялық маңызы зор екенін атады, себебі канал су ресурстарын сақтауды және тұрғындардың қауіпсіздігін қамтамасыз етеді.
Одан кейін ұзындығы 2 шақырым болатын Боралдай өзенінің арнасын қайта жаңғырту және іргелес аумақты абаттандыру жұмыстарын көрді. Бұл іс 2026 жылы тамызда бітеді деп жоспарланған. Әкімнің орынбасары құрылыс қарқынын жеделдетіп, жұмыс сапасын қадағалау қажеттігін айтты. Бұл шара тұрғын үйлерді су басудан қорғауға бағытталған.
Сапар соңында Сматлаев «Құрылысшы» және «Өжет» шағынаудандарында салынып жатқан бес кәріздік-сорғы станциясын көріп шықты. Бұл нысандар 10 мыңнан астам тұрғынды қамтуға есептелген. Жоспар бойынша жоба 2025 жылы желтоқсанда аяқталуға тиіс. Бүгінде бес станцияның төртеуі жоғары дайындық сатысында тұр. Әкімнің орынбасары мердігерге сапаны бақылауды күшейтіп, құрылысты белгіленген мерзімде аяқтауды тапсырды.