Ерболат Досаев 28-30 мамыр аралығында қалада Ш. Уәлиханов атындағы алаңда өтіп жатқан «Алматы кітап жәрмеңкесі» атты кітап жәрмеңкесінде болды.
Ауқымды мәдени іс-шараның ұйымдастырушылары Алматы әкімдігінен басқа Мәдениет және спорт министрлігі мен Ұлттық мемлекеттік Кітап палатасы болып табылады.
Кітап жәрмеңкесінің ашылуына ҚР Мәдениет және спорт министрі Дәурен Абаев, Қазақстан Жазушылар одағының төрағасы Ұлықбек Есдәулет және басқа да әдебиет пен мәдениеттің көрнекті өкілдері қатысты.
Кітап жәрмеңкесіне 50-ден астам отандық баспалар мен кітап дүкендері, сондай-ақ Қырғызстан мен Ресейден келген делегациялар қатысуда. Көрме-жәрмеңкенің қонақтары кітап нарығының жаңалықтарымен танысуға, авторлармен кездесуге және қолтаңба сессиялары аясында қол қойылған туындылардың даналарын алуға мүмкіндік алды.
Іс-шара аясында мерекелік концерт, жазушылар мен ақындардың түрлі шығармашылық нөмірлері жоспарланған. Мегаполис қонақтары мен тұрғындары зияткерлік викториналарға қатыса алады, жеңімпаздарға кітаптар беріледі.
Жәрмеңкеде Қазақстан Республикасы Ұлттық мемлекеттік Кітап палатасының «Сирек кітаптар мен қолжазбалар мұражайы» экспонаттары ұсынылады. Барлық тілек білдірушілердің XIX ғасырдың аяғы мен XX ғасырдың басында жарық көрген Алаш қозғалысының көрнекті қайраткерлерінің бірегей кітаптарымен танысуға мүмкіндігі бар.
Жәрмеңке өтетін күндері баспа ісін, кітап сатуды, заманауи балалар әдебиетін дамыту бойынша дөңгелек үстелдер өтеді, онда мамандар осы мәселелерді егжей-тегжейлі талқылайды.