Алматы әкімі Дархан Сатыбалды Алатау ауданына жасаған жұмыс сапары барысында «Айгерім-1,2» және «Шаңырақ-1» шағынаудандарының тұрғындарымен кездесті.
Тұрғындар ауызсу және кәріз желілерінің құрылысы баяу жүріп жатқанына наразылық білдірді.
«Айгерім-1,2» шағынауданында тарату желілерінің құрылысы жүргізіліп жатыр. Жобаны жүзеге асыру 2021 жылы басталған. Су құбырының жалпы ұзындығы – 104,5 шақырым, кәріз желісі – 29,5 шақырым. Қала әкімі жұмыстың орындалу қарқынына көңілі толмай, бақылауды күшейтуді тапсырды. Құрылысты аяқтау келесі жылға жоспарланған.
Бұдан бөлек, Дархан Сатыбалды көшелерді асфальттауды соза бермей, желі құрылысы біткен аумақтарға жол жабындысын кезең-кезеңімен төсеуді, ал жұмыс әлі жүріп жатқан учаскелерде уақытша асфальт қиыршығын пайдалануды тапсырды.
Сонымен қатар, «Шаңырақ-1» шағынауданында тұрғындармен кездесу өтті. Мұнда да тарату желілерін салу жобасы жүзеге асырылып жатыр. Жоба бойынша ұзындығы 45,7 шақырым су құбыры, 53,8 шақырым кәріз желісі және 10 кәріздік-сорғы станциясы салынып, 2,2 мыңнан астам тұтынушы қамтылуы тиіс.
Тұрғындар жобаның ұзаққа созылғанына шағымданды. Алматы әкімі жұмысты екі ай мерзімінде аяқтауды тапсырды. Сонымен қатар, тұрғындардың өтініші бойынша бастапқы жобаға кірмеген төрт көшеге асфальт төселеді. Инженерлік желілер тартылып біткен учаскелерде де кезең-кезеңімен жол жабындысы төселеді.
Жергілікті халық жол қауіпсіздігі, көше жарығы, балалар алаңқайларын салу және өзге де мәселелерді көтерді. Дархан Сатыбалды жауапты басқармаларға оларды шешу жолдарын қарастырып, тұрақты бақылауда ұстауды тапсырды.