Алматы қаласының әкімдігінде Паралимпиада ойындарына қатысқан Кәмиля Досмаловаға құрмет көрсетілді.
Кәмиля Досмалова — пара-таэквондодан халықаралық дәрежедегі спорт шебері, ол Парижде өткен XVII жазғы Паралимпиада ойындарында бесінші орынға ие болды. Алматы әкімінің орынбасары Бейбіт Шаханов спортшы мен оның жеке жаттықтырушысы Әнуар Үсеновты құттықтап, олардың ерік-жігері мен табандылығы баршаға үлгі екенін атап өтті.
Кездесу барысында Бейбіт Шаханов Премьер-Министр Олжас Бектеновтың атынан Кәмиля Досмалова мен оның жаттықтырушысына алғыс хаттар табыс етті.
Сондай-ақ, әкімнің орынбасары Кәмиля Досмаловаға 2 миллион теңгелік ақшалай сертификат, ал оның жаттықтырушысы Әнуар Үсеновке 1,5 миллион теңгелік сертификат сыйлады. Сонымен қатар, спортшыға қызметтік баспана берілді.
«Барлық қазақстандықтарға және Алматы әкімдігіне қолдау көрсеткендері үшін үлкен алғысымды білдіремін. Бұл қолдау менің болашақ жетістіктерімнің негізі болады», — деді Кәмиля Досмалова.
Айта кетейік, өткен Паралимпиада ойындарында Қазақстан құрамасы рекордтық тоғыз медаль жеңіп алды, оның ішінде 2 алтын, 3 күміс және 4 қола медаль бар.