Қазақстан Республикасы Ішкі істер министрлігінде 1 мамыр – Қазақстан халқының бірлігі күніне және Бауыржан Момышұлының 115 жылдық мерейтойына орай өткізілген "Мемлекеттік тіл – бірліктің негізі" атты дөңгелек үстелге М.Есболатов атындағы Алматы академиясынан полиция майоры А.Абдуллаев қатысып, министрдің орынбасары А.Сайтбековтың атынан алғыс хатпен марапатталды, деп хабарлайды aqshamnews.kz Polisia.kz-ке сілтеме жасап.
- Мемлекеттік тілдің мәртебесін көтеру – барлығымыздың ортақ парызымыз. Ұлтым ұйғыр болғанмен, қазақ халқымен бала кезден етене араласып өстім. Бала күнімнен қазақ достарымның арқасында қазақ тілін жақсы меңгердім. Қазір мен Мақан Есболатов атындағы Алматы академиясында оқу-сап бөлінісінің курс бастығының орынбасары болып қызмет атқарамын. Бүгінгі курсанттар – ертең елімізге қызмет ететін офицерлер. Біз олардың қызметке араласқанда іс-қағаздарын мемлекеттік тілде сауатты орындауы үшін бүгіннен бастап қадағалаймыз, оқытамыз, үйретеміз. Курсанттардың арасында қазақ тілін жақсы меңгерген өзге ұлт өкілдері де бар. олардың тілге деген құрметі мен ынтасын үнемі насихаттап отырамыз, - деді дөңгелек үстелде сөз сөйлеген А.Абдуллаев.