Цифрлық жаңғырудың басты нәтижесі технологиялардың санымен емес, олардың қоғам өміріне әкелген нақты өзгерістерімен өлшенуі керек, деп хабарлайды aqshamnews.kz тілшісі.
Президент Қасым-Жомарт Тоқаевтың Қазақстан халқына «Жаңа тарихи кезеңдегі Қазақстанның өзекті міндеттері» атты Жолдауына орай ҚР МҒЖБМ ҒК «Философия, саясаттану және дінтану институты» ШЖҚ РМК Дінтану орталығының директоры Шағырбай Алмасбек Дүйсенбекұлы өз пікірін білдірді.
"Мемлекет басшысының цифрландыру мен жасанды интеллектіні дамытуға қатысты тапсырмалары Қазақстанның ұзақ мерзімді даму бағыттарын айқындайды. Бүгінде технологиялық жаңғыру уақыт талабы ғана емес, елдің бәсекеге қабілеттілігін арттырудың маңызды шарты. Жасанды интеллектіге негізделген цифрлық экономиканы қалыптастыру үшін озық технологияларды енгізумен қатар, адами капиталды дамытуға, жаңа дағдыларды меңгеруге және инновациялық бастамаларды қолдауға басымдық беру қажет. Бұл үдеріске мемлекетпен бірге ұлттық компаниялар, бизнес және креативті индустрия өкілдері де белсенді қатысуы тиіс. Сонымен қатар, мемлекеттік басқару сапасын арттыру цифрлық трансформацияның негізгі бағыттарының бірі. Бюджет қаражатының тиімді жұмсалуы, инфрақұрылымдық жобалардың сапалы іске асырылуы және әр кезеңдегі бақылаудың күшеюі мемлекеттік органдар жұмысының нәтижелілігін айқындайды", – деді А.Шағырбай.
Оның пайымдауынша, цифрлық жаңғырудың басты нәтижесі технологиялардың санымен емес, олардың қоғам өміріне әкелген нақты өзгерістерімен өлшенуі керек. Тиімді мемлекеттік басқару, ашықтық, кәсібилік және инновацияға бейім ұрпақ болашақ экономикасының берік негізі.
Қазақстанның жаңа дәуір талаптарына сай дамуы үшін технологиялық мүмкіндіктерді тиімді пайдаланып, жаңғыруды жүйелі әрі жауапты түрде жалғастыру маңызды.