Алимент төлеуден жалтарған тұлғаларға қатысты іздеу жариялайды
Баланы асырау – ата-ананың заңмен бекітілген міндеті. Бұл міндеттің орындалуы ата-ананың некеде болуы, азаматтық некеде немесе ажырасқан болуына қарамастан өзгермейді. Қазіргі таңда елімізде жауапкершілікті сезінбейтін ата-аналардың баласына алимент төлемей жүргені өзекті мәселелердің бірі болып отыр. Алименттер ай сайын ата-анасының еңбекақысынан немесе өзге табысынан заңмен белгіленген мөлшерде төленуі тиіс.
Жұмыс істемейтін борышкердің төлеуге міндетті алимент мөлшері Қазақстан Республикасының орташа жалақысына сәйкес есептеледі. Құзырлы органдар тарапынан түрлі шаралар қабылданып жатса да, баласының жағдайына мән бермейтін, алимент төлеуден жалтарып жүрген әкелердің саны азаймай отыр.
Алимент төлеуден жалтарып жүрген борышкерлерге қатысты жұмыстар үздіксіз жүргізілуде. Бұл жұмыстар борышкерлерді жұмысқа орналастыру, берешегі көп борышкерлерді әкімшілік жауапкершілікке тарту, олардың атына тіркелген мүлікке тыйым салу секілді шараларды қамтиды.
Сонымен қатар, Қазақстан Республикасының атқарушылық іс жүргізу заңнамасына сәйкес алимент төлеуден жалтарып жүрген борышкерлерге іздеу жариялау – мәжбүрлеу шараларының бірі болып табылады. Сот орындаушысы алимент төлеуден жалтарып жүрген борышкерді табу үшін іздеу жариялау туралы қаулы шығарады, бұл қаулы прокурордың санкциясынан өтіп, көші-қон полициясына жолданады.
Көші-қон полициясы алимент төлемей жүрген борышкерді табу мақсатында қажетті іздеу шараларын жүргізеді. Борышкер анықталған жағдайда, көші-қон полициясы одан атқарушылық іс бойынша міндеттемелерін орындауға байланысты түсініктеме алады. Содан кейін сот орындаушысына борышкердің мекенжайы туралы толық мәлімет жолданып, қарызды өндіру жұмыстары жалғасады.
Борышкерлер алимент төлеу – заңды міндет екенін және оны орындамаған жағдайда әкімшілік және қылмыстық жауапкершілікке тартылатынын ұмытпауы қажет.