Алматыда «Өніп тұр бір қызыл гүл таста тірі» атты патриоттық іс-шара өтті.
Алматының Алатау ауданында Жеңістің 80 жылдығы мен Кеңес Одағының Батыры Әлия Молдағұлованың 100 жылдығына арналған тағылымды патриоттық шара өтті. «Ардагерлерді ардақтайық» және «Кітап – AMANAT» жобалары аясында ұйымдастырылған бұл іс-шарада ұлт жадысын жаңғыртып, ұрпақтар сабақтастығы ерекше көрініс тапты.
Шараның шоқтығын биіктеткен – есімі аңызға айналған батырмен аттас «Amanat» партиясының мүшелері. Әлия есімді арулар батыр рухын жалғап, оның ерлігі мен есімінің бүгінгі буын үшін қаншалықты маңызды екенін жүрекжарды сөздермен жеткізді. Ерлікке тағзым ретінде олардың қатарын жаңа Әлия есімді мүшелер толықтырды. Салтанатты рәсімде партия қатарына өткен арулар елге адал қызмет ету, патриоттық құндылықтарды ұлықтау жөнінде ойларын ортаға салып, батыр есімін алып жүру – абырой ғана емес, үлкен рухани жауапкершілік екенін атап өтті.
– Әлия – біз үшін жай ғана есім емес. Бұл – ерлік пен адалдықтың мәңгілік символы. Осындай қасиетті есімді иелену – тағдырдың тартуы ғана емес, тарихи аманат, – деді шараға қатысушылар.
Ресми бөлімнен кейін қатысушылар Астана алаңындағы Әлия Молдағұлова мен Мәншүк Мәметова ескерткішіне барып, ерлікпен қаза тапқан қаһармандардың рухына тағзым етіп, гүл шоқтарын қойды.
Бұл жиын – батырлардың биік өнегесі мен елге деген сүйіспеншіліктің көркем көрінісі ретінде жадымызда сақталады. «Amanat» партиясы ұлттың рухани тұғырын нығайтатын осындай шараларды жалғастыра бермек.