Қазақстанда мемлекеттік қолдау шараларының қолжетімділігі мен ашықтығын қамтамасыз ету мақсатында пилоттық режимде «Әлеуметтік әмиян» жобасы іске асырылуда.
Ол оқушыларға проактивті режимде тегін ыстық тамақ беруді көздейді, деп хабарлайды aqshamnews.kz.
Үкіметтің Telegram каналында жарияланған ақпаратқа сай, қызметті мемлекеттік қолдаудың барлық шаралары жинақталған eGove Mobile платформасының көмегімен пайдалануға болады. Бүгінгі таңда жобаға 2 мың мектеп қосылып, 200 мыңнан астам ыстық түскі ас берілді.
«Бұрын ыстық тамақ үшін азаматтар құжат жинайтын. Олар осы санатқа жататындығын растады, яғни олардың құқығы бар немесе жоқ екенін анықтайтын. Қазіргі уақытта олар жай ғана сізге ыстық тамақ берілуі керек деген хабарламаны алады. Яғни, “алғыңыз келе ме, жоқ па?” деген. Егер келісім берсеңіз, ваучер автоматты түрде жасалады, олар оны іске қосады және ыстық тамақ беріледі. Оған 3-5 минут қана уақыт кетеді», — деді «Әлеуметтік әмиян» жобасының жетекшісі Фараби Қалдыбиев.