Booking.com сайты саяхатшылардың пікірін негізге алып 2025 жылы баруға тұрарлық жаһандағы ең қонақжай жерлердің рейтингін түзген.
Рейтингке өкінішке қарай Қазақстандағы бірде-бір жер енбеген. Туристер саяхаттың ең жағымды тұсы деп қонақжайлылық пен қауіпсіздікті атаған.
Зерттеу 360 миллионнан аса шынайы пікірге сүйеніп жасалған.
Саяхаттаушылар қонақүйлерде қонып, жалға берілетін көліктерде немесе таксиде отырып көрген соң ғана жазба қалдырған.
– Бұл тізім кофеханалар мен жағажайлардан ортағасырлық қалалар мен тропикалық елді мекендерге дейінгі әлемдік бағыттардың әртүрлілігін көрсетеді. Олардың барлығы ұмытылмас оқиғаларға шабыттандырады, – дейді қызмет өкілдері.
2025 жылы әлемдегі ең қонақжай 10 орын:
Сигирия, Шри-Ланка;
Касорла, Испания;
Урубичи, Бразилия;
Таупо, Жаңа Зеландия;
Сент-Огастин, АҚШ;
Орвието, Италия;
Манисалес, Колумбия;
Кведлинбург, Германия;
Ко-Ланта, Тайланд;
Честер, Ұлыбритания.
Әлемдік рейтингте бірінші орынды ЮНЕСКО-ның бүкіләлемдік мұра тізіміне кірген Шри-Ланканың Матале ауданындағы биіктігі 180 метр болатын бірегей жартас Сигирия иеленген. Екінші орынға Испаниядағы Касорла жайғасса, үздік үштікті Бразилиядағы Урубичи қаласы түйіндеп тұр.