Қазақстанда соңғы 3 апта бойы эпидемиологиялық ахуалдың біртіндеп тұрақтануы байқалады. Бұл туралы Үкімет отырысында ҚР Денсаулық сақтау министрі Алексей Цой мәлім етті, деп хабарлайды almaty-akshamy.kz ҚазАқпарат тілшісіне сілтеме жасап.
«Қазақстанда 18 тамызға дейін COVID-19-дың оң нәтижесімен 708 379 және КВИ теріс нәтижемен 66 381 науқас тіркелген. Түркістан облысынан басқа барлық өңір «қызыл» аймақта тұр. Қазақстанда соңғы 3 апта бойы эпидемиологиялық ахуалдың біртіндеп тұрақтануы байқалады. Бір аптада орташа есеппен шамамен 53 мың жағдай тіркеледі. 1 тамыздан бері коронавирус инфекциясының таралу индексі Қазақстанда 14 пайызға қысқарып, 1,11-ден 0,97-ге төмендеді»,- деді министр.
Оның дерегінше, инфекциялық төсек-орындардың жүктемесі 53, ал реанимациялық төсек-орындардың жүктемесі 47 пайызды құрап отыр.
«Төсек-орындардың ең жоғары жүктемесі Ақтөбе облысында 69%, Қызылорда облысында 66%, ал Алматы облысында 64 пайызды құрайды», - деді Алексей Цой.