"Қазгидромет" синоптиктері 29, 30 және 31 қаңтарға арналған ауа райы болжамын ұсынды, - деп хабарлайды aqshamnews.kz тілшісі.
Алдағы үш тәулікте Қазақстан аумағының басым бөлігі кең антициклонның ықпалында болады. Соған байланысты ауа райы көбіне жауын-шашынсыз болады деп күтіледі.
"Тек елдің батыс, оңтүстік және оңтүстік-шығыс өңірлері атмосфералық фронттардың әсерінде қалады. Бұл аймақтарда жаңбыр мен қар түріндегі жауын-шашын, бұрқасын, көктайғақ күтіледі. Түркістан облысының таулы аудандарында 31 қаңтарда қатты жауын-шашын болады. Қазақстан бойынша тұман түсіп, желдің күшеюі болжанады", – деді синоптиктер.
Ауа температурасы қандай болады?
Метеорологтар мәліметінше, Қазақстан аумағында ауа температурасы біртіндеп жоғарылайды. 31 қаңтарда күндіз ауа температурасы:
- Қазақстанның батысында, оңтүстігінде және оңтүстік-шығысында – 5 градус аяздан 5 градус жылыға дейін,
- солтүстік-батысында, солтүстігінде, шығысында және орталық өңірлерінде – 2–10 градус аяз болады.